Politiit ullormut nalunaarutaat: Iliveqarfimmi serlersaarisoqarpoq
Upernavimmi iliveqarfimmi ilerrit ilaat 16-it serlersaarfigineqarsimapput. Ilerrit taakkua sanningasortaat qaqortut soorlu nallorlugit, uppitillugit allatulluunniit iliorlugit serlersaarfigineqarsimasut, Kalaallit Nunaanni Politiit pigaartuisa pisortaat Jeppe Andsager oqarpoq.
Upernavimmi iliveqarfimmi serlersaarisoqarsimasoq politiinut ataasinngornermi septembarip 23-ani ullaap tungaani nalunaarutigineqarpoq, septembarilli 20-ani ualikkut sisamat septembarillu 21-ani unnukkut arfineq-marluk akornanni serlersaarfigineqarsimassangatinneqarpoq.
- Kikkut taamaaliortuunerannik ilisimannittunik suliami tassani oqaloqateqarpugut, kikkulli taamaaliortuunerannik allanik ilisimannittoqarpat paasissutissaateqartoqarpalluunniit suliamik misissuinitsinni ikiortiseraavut, taamaammat attaveqaqqunaqaat, Jeppe Andsager oqarpoq.
Uuliakoortoqaqqittoq
Uuliakoortoqartoq, Sisimiuni politiinut ataasinngornermi septembarip 23-ani ualikkut nalunaarutigineqarpoq. Uuliakoortoqarneranik politiinut sapaatit akunnialuinnaat ingerlaneranni pingajussaanik nalunaartoqarpoq.
Angallat Adolf Jensen Nanortaliup eqqaani umiiarnerup kingorna kivisoq taakkununnga ilaavoq, taannalu uuliakuulersimasoq politiinut septembarip 20-ani nalunaarutigineqarpoq.
Sisimiuni orsiiviit ilaasa aporneqarnerata kingorna solaarimik uuliamillu 750-800 literit missaannik ataasinngornermi ualikkut uuliakoorneq qatserisartunit salinneqarpoq.
Tassa Sisimiuni orsiiveqarfiit ilaanni uuliakoortoqarpoq, uuliakoorfiusullu eqqaa qatserisartut salereermassuk ualikkut sisamat missaanni assersoqqajunnaartoq, politiit pigaartuisa pisortaat oqarpoq.
