Politiit Qaqortumi aallaasilisarlutik najukkamukartut - pinartoqanngilarli

Politiit tallimat aallaasilisarlutik Qaqortumi najukkamut marlunngornermi unnukkut ornigupput. Politiit najukkamut apuukkamik angerlarsimaffimmi eqqissiviilliortoqartoq paasivaat, pisorli annerrusumik iliuuseqarfigisariaqanngitsoq nalilerpaat.

Allattoq Nukaaka Tobiassen

juulip 19-at 2023 08:06

Politiit tallimat Qaqortumi najukkamut aallaasilisarlutik ornigummata innuttaasunit maluginiarneqarput.

Politiit najukkamut ornigunnerat angerlarsimaffimmi eqqissiviilliortoqarsimaneranik marlunngornermi nalunaaqutaq 20.17 marlunnit nalunaarutigineqarpoq. Politiinut nalunaartup aappaata najukkami aallaammik seqqortoqarsimasoq oqaatigitaa.

Politiilli najukkamut apuukkamik ingerlaannaq paasivaat festerfiusumi oqqattoqarsimasoq, taamaalillunilu nipiliortoqarnera aallaasersortuusorineqartoq.

Aamma atuarukAngut 18-nik ukiulik Sisimiuni tigusaasoq

Kalaallit Nunaanni Politiit pigaartut pisortaat Bjørn Bjerregaard KNR-imut taama paasissutissiivoq.

- Festerfimmi oqqattoqarsimavoq, pisumullu apuukkatta inuit marluk ingerlareersimapput, najugaqarfimmilu aallaaseqanngitsoq takuarput, Bjørn Bjerregaard oqarpoq.

Taamaasillutik politiit najukkamit ingerlapput, pisorlu annertunerusumik iliuuseqarfiginiarnagu, suliaq naammassisutut nalilerpaat.

Kalaallit Nunaanni Politiit pigaartut pisortaat taama nassuiaavoq.

Nutaarsiassami kukkunermik nassaarsimaguit uunga allaffigineqarsinnaavugut.