Politiit: Inuit anorersuarnerani eqqissisimapput - kisianni illorpaaluit aseruatiterput
Kitaata sineriaani inuit amerlanerpaartaat nalunaaquttap akunnerini kingullerni 24-ni anorersuarnerani angerlarsimarrapput.
Politiillu malugusupput. Marlunngornermimi unnukkut pingasunngornerullu unnuaani upalaarsimanngillat.
Inuit qassikattannguit aqqusinerni illoqarfinnilu takussaasimapput. Politiit anorersuarnerani ornigukkasuagaqarsimanngitsut, nunatsinni politiit KNR-imut ilisimatitsipput.
AAMMA ATUARUK Atortut teqqaasut, quit aserortut anorersuartumilu qajannaarsuineq
- Anorersuarnerani ornigukkasuagaqanngilagut. Tamanna nunatsinni tamarmi atuuppoq.
Taamaammat oqartussat inunnik anorersuarnerani ajoqusertoqarsimaneranik kalerrinneqanngillat.
DMI: Nuuk eqqugaanerpaavoq
DMI-lli anorersuarnera arajutsisimanagulu uuttorsimavaa. Nuummi anorersuarnerpaasimasoq, DMI-p uuttortaanerata takutippaa.
Kujataanili Paamiuniit Sisimiut ilanngullugu anorersuarujussuarpoq.
Nuummi anorersuup marlunngornermi sakkortunerpaaffiani issariarnermut meterinik 31-nik sakkortussuseqarsimavoq. Ulussaarsuangajassimasoq, DMI-mi pigaartut pisortaat Frank Nielsen KNR-imut ilisimatitsivoq.
Nuummi anorersuaq issariarnermut meterinik 40-nik sakkortussuseqartarsimammat ulussaarsuarsimavoq.
Tamannalu sumiiffinni arlalinni illut, biilit, allagartat atortussallu allat aseruatiternerannik kinguneqarpoq.
Nuummi eqqaaveqarfiit qalissiaat katagartut assingi Facebookimi siammarneqarput, illullu iigarsui aamma katagarlutillu teqqaasimapput.
Nunatsinnilu illoqarfiit pingaarnersaanni umiatsiat ilaat pituttorneqarluarsimanatillu saavipput.
Upernavimmiit Nuuk ilanngullugu pingasunngornermi kujasissumik anorersuarujussuarsinnarallassasoq, DMI-p aarlerisaarutigaa. Ullunili tulliuttuni inoriaqqoriartussalluni.
Kujataani kujasissumik anorersuarujussuassaaq, pingasunngornermili ullup ingerlanerani aamma inoriaqqoriartussalluni.
