Politiit: Innuttaasunut ataatsimiisitsinissami ernumanartoqanngitsoq
Kuannersuarni aatsitassarsiulersaarneq pillugu sapaatip akunnerata ingerlanerani innuttaasunut ataatsimiisitsisoqassaaq. Tamannali Greenland Mineralsimiit peqataaffigineqassanngilaq, ataatsimiinissamummi piginneqatigiiffimiit peqataasoqarpat sillimaniarnikkut aarlerinartoqaqinammat.
Taamaattorli piginneqatigiiffimmiit sulisunik peqataatitaqarneq ernumassutissaqanngitsoq Kalaallit Nunaanni Politiivisa nalilerpaat:
- Innuttaasunik ataatsimiisitsinisisoqarnissaanut ernumassutissaqanngilaq, politeeqarfiit pisortaat Jørgen Harlev oqarpoq.
AAMMA ATUARUK Kuannersuarnut suliniut pillugu innuttaasunut ataatsimiititsinissat piareertut
Naalakkersuisut oqarneratuut ataatsimiinerni video atorlugu ataatsimeeqqataanissamut Greenland Minerals neqeroorfigineqarpoq, tamanali kissaatigineqarsimanngilaq.
Aarlerinissamut tunngavissaqanngitsoq
Piginneqatigiiffiup Greenland Mineralsip tunngavilersuutaa aatsitassaqarnermut naalakkersuisup Naaja Nathanielsenip uggoraa. Tusagassiuutinut nalunaarummi ima oqaaseqarpoq:
- Tamanna peqataannginnissamut tunngavigineqarsinnaanera naammanngitsutut isigaara.
Kuannersuarni suliniut pillugu paasissutissat piviusut:
- Kuannersuit Narsap kilometerinik 7,5-inik ungasitsigisumi avannarpasissortaaniippoq.
- Aatsitassarsiorfik asimi 700 meterinik qutsitsigisumiipppoq.
- Greenland Mineralsip aatsitassarsiorfk ukiuni 37-ni piiaaffiginiarpaa.
- Aatsitassarsiorfiup piiaaffigineqarnerani nunaqavissunik 328-nik suliffissaqartitsisoqarsinnaassasoq naatsorsuutigineqarpoq.
- Aatsitassarsiorfik qaqutigoortunik ilaatigut uranimik thoriumimillu saffiugassaqarpoq.
- Aatsitassarsiorfik saffiugassiassamik ukiumut millionit tonsit pingasut missaannik piiaaffiusassaaq.
- Ukiuni 37-ni aatsitassarsiornermit sinnikut 111 millionit tonsiussapput qaarsorlu (qaarsumit piiarneqartumit sinnikut) 111 millionit tonsiussalluni.
Tusarfiit: Greenland Mineralsip ASN-ia ISN-ialu.
Fakta om Kuannersuit-projektet:
Piginneqatigiiffik tassanilu sulisunut toqqaanartumik toqqaananngitsumilluunniit aarlerisaarisoqarsimannginnera, taassumap aamma nassuiaatigaa.
Ataatsimiinissamut peqataanissamut aarlerinartoqarneranik tunngavissaqanngitsoq politiit aamma isumaqarput – piginneqatigiiffimmut Greenland Mineralsimut ataatsimiinermilu peqataasussanut allanut:
- Ataatsimiinissamut peqataanissamut aarlerineq tunngavissaqanngitsoq takusinnaavarput. Taamaatoqassappat peqataasussat tamarmik ilisimatinneqartussaatitaapput, Jørgen Harlev oqarpoq.
AAMMA ATUARUK Greenland Minerals Kuannersuit pillugit ataatsimiititsinernut peqataanianngitsoq
Innuttaasunut ataatsimiisitsinermi sillimaniarnermut qulakkeerinnillutik politiit peqataasussaammata aamma erseqqissaatigaa.
Tusarniaasoqarnerani aatsitassarsiutileqatigiiffik inatsisitigut pisussaaffeqanngilaq peqatanissaminut.
Aatsitassarsiutileqatigiiffik Greenland Minerals oqaaseqartinniarlugu oqarasuaatikkut e-mailikkullu KNR-imit pissarsiariniarneqaraluarpoq tamannali iluatsisimanngilaq.
Innuttaasunut ataatsimiisitsinermi avatangiisinut sunniutaasussat inuiaqatigiinnilu piujuartitsinissamut sunniutissaannik nalilersuinermik eqqartorneqartussaapput.