Greenland Minerals Kuannersuit pillugit ataatsimiititsinernut peqataanianngitsoq
- Greenland Minerals A/S peqataasinnaanani nalunaarmat uggoraara. Isumaqarpunga peqataasinnaanani nalunaarneq tunngavissaqarpallaanngitsumik pisoq.
Aatsitassanut naalakkersuisoq, Naaja Nathanielsen (IA) oqarpoq.
Kuannersuarni aatsitassarsiornissamik suliniut pillugu innuttaasunut ataatsimiititsinerit ullumi aallartissapput.
Tamanna Greenland Mineralsip peqataaffigissanngilaa.
Aatsitassanut naalakkersuisup oqarnera naapertorlugu aatsitassarsiutileqatigiiffiup innuttaasunut ataatsimiititsinernut peqataaniannginnini sapaatip akunnerata siuliani sisamanngornermi nalunaarutigaa.
Nunatta kujataanut innuttaasunut ataatsimiititsiartornissamut peqataasussat:
Ineqarnermut, Attaveqatigiinnermut, Aatsitassanut, Inatsiseqarnermut Naligiiffitaanermullu Naalakkersuisoq, Naaja H. Nathanielsen
Kommune Kujallermi borgmesteri, Stine Egede
Aatsitassanut inatsiseqarnermullu naalakkersuisoqarfimmi sulisoq
Peqqinnissamut naalakkersuisoqarfimmi sulisoq
Kommune Kujallermi sulisoq
Oqalutsit marluk
Ataatsimiinnermik ingerlatsisoq
Teknikeri
Sillimaniarnermi sulisut marluk
Inuussutissarsiorneq Aatsitassallu pillugit Inatsisartut ataatsimiititaliamit angalaqataasoq ataaseq
- Siullermik pingaarnertullu ingerlatseqatigiiffik sulisumik aallartitassamillu isumannaassusaannut aarleqquteqarpoq. Ingerlatseqatigiiffik paasissutissiivoq, siullermeertumik tusarniaasoqarnerani innuttaasunit qunusaarisumik pissusilersortoqarneranut assersuutissaqartoq, aammalu tusarniaaneq pisussaq sioqqullugu ”ersarissumik politikkimut sangutitsisoqarsimasoq”, isumartik malillugu ingerlatseqatigiiffiup sulisumik aallartitassamillu isumannaassusaannik qulakkeerisinnaannginneranik pilersitsisumik, aatsitassanut naalakkersuisoq oqarpoq.
AAMMA ATUARUK Naaja Nathanielsen innuttanik ataatsimiitsitsisarnerit pillugit: Kingullermitut ingerlassapput, maannali uagut peqataalluta
Ingerlatseqatigiiffik Greenland MIneralsimut sulisuinulluunniit toqqaannartumik toqqaannanngitsumilluunniit siorasaarneqarsimanngitsoq paasissutissiissutigisimagaa taassuma nassuiaatigaa.
Kingullermik innuttaasunut februaarimi ataatsimiititsisoqarmat Greenland Mineralsip Namminersorlutik Oqartussaniillu atorfillit peqataapput. Ingerlatseqatigiiffiup ASN-ia ISN-ialu tassani saqqummiunneqarput. Tassa suliniutip avatangiisinut sunniutissaanik (ASN) kiisalu inuiaqatigiinnut aningaasaqarnikkullu sunniutissanik (ISN) naliliinerit.
Greenland Mineralsip innutaasunut ataatsimiititsinerit ASN-imut ISN-imullu tunnganavianngissorai.
- Naalakkersuisut taamatut aarlerissuteqarneq ilumuunnginnerarpaat. Tusarniaalluni ataatsimiititsinernut tunngavilersuutaasoq pingaarneq tassarpiaavoq, ingerlatseqatigiiffiup ASN-iata aamma ISN-iata tamanut ammasumik tusarniaassutigineqarnerat pillugu aatsitassanut ikummatissanullu inatsimmi aalajangersakkat malinneqarnissaat, Naaja Nathanielsen oqarpoq.
Greenland Mineralsip peqataanisaa piumasaqaataanngitsoq
Tamannali innuttaasunut ataatsimiititsisoqaqqittariaqarneranik isumaqanngilaq. Naaja Nathanielsenip oqarnera naapertorlugu Greenland Mineralsip innuttaasunut ataatsimiititsinernut peqataanissaa piumasaqaataanngilaq.
- Greenland Minerals A/S videolink aqqutigalugu peqataanissamik neqeroorfigineqarpoq, tamannalu ingerlatseqatigiiffiup akuerinngilaa. Ingerlatseqatigiiffiup peqataannginnera pissutigalugu apeqqutit akissuteqarfigineqarsinnaanngitsut ingerlatseqatigiiffimmut ingerlateqqinneqassapput aammalu tusarniaaneq pillugu nalunaarusiami, ingerlatseqatigiiffiup suliarisassaani, akissuteqarfigineqassallutik, aatsitassanut naalakkersuisoq oqarpoq.
Kuannersuarni suliniut pillugu paasissutissat piviusut:
- Kuannersuit Narsap kilometerinik 7,5-inik ungasitsigisumi avannarpasissortaaniippoq.
- Aatsitassarsiorfik asimi 700 meterinik qutsitsigisumiipppoq.
- Greenland Mineralsip aatsitassarsiorfk ukiuni 37-ni piiaaffiginiarpaa.
- Aatsitassarsiorfiup piiaaffigineqarnerani nunaqavissunik 328-nik suliffissaqartitsisoqarsinnaassasoq naatsorsuutigineqarpoq.
- Aatsitassarsiorfik qaqutigoortunik ilaatigut uranimik thoriumimillu saffiugassaqarpoq.
- Aatsitassarsiorfik saffiugassiassamik ukiumut millionit tonsit pingasut missaannik piiaaffiusassaaq.
- Ukiuni 37-ni aatsitassarsiornermit sinnikut 111 millionit tonsiussapput qaarsorlu (qaarsumit piiarneqartumit sinnikut) 111 millionit tonsiussalluni.
Tusarfiit: Greenland Mineralsip ASN-ia ISN-ialu.
Ingerlatseqatigiiffiup videolink aqqutigalugu innuttaasunut ataatsimiinnernut peqataarusuleriataarnissaa naalakkersuisup neriuutigaa.
- Ataatsimiititsinerit kikkut tamarmik isummernissaannut apeqquteqarnissaannullu periarfissaqartitsisumik, eqqissisimasumik pilersitsiviulluartumillu ingerlanneqassasut naatsorsuutigilluinnarpara. Tamannami tusarniaalluni ataatsimiititsinernut siunertarpiaavoq. Aammalu erseqqissassavara, ataatsimiititsinerit pillugit isumannaallisaanermut aarlerisaarisoqarneranik Naalakkersuisut ilisimasaqanngimmata, Naaja Nathanielsen oqarpoq.
AAMMA ATUARUK Politikerit tusarniaanermi angalanissaannut missingersuutit: 700.000 koruunit
Greenland Mineralsip peqataaniannginnerata kingunerisaanik peqataasussat nutarterneqarput, taamaalilluni ataatsimiititsiartortut aqqaniliinnaassallutik, aatsitassanut naalakkersuisoqarfik allappoq.
Naalakkersuisut kingullermik taamaatitsiinnartut
Pilersaarut malillugu innuttaasunut ataatsimiititisinerit Narsarsuarmi ullumi aallartissapput. Tamatuma kingorna Qassiarsuk, Narsaq, Qaqortoq, Igaliku aamma Nanortalik ataatsimiititsisoqassalluni.
Aatsitassarsiornissamik suliniut pillugu ukioq manna siusinnerusukkut innuttaasunut ataatsimiititsisoqareeraluarpoq. Tamannali Naalakkersuisuni politikerinit peqataaffigineqanngilaq.
Politikerimmi Greenland Mineralsip Namminersorlutik Oqartussallu nunatta kujataani innuttaasunut februaarimi ataatsimiititsineranni februaarimi peqataanngillat.
Taamani aatsitassanut naalakkersuisuusup, Jens-Frederik Nielsenip (D) oqarnera naapertorlugu politikerit peqataanissaminnik taamaatitsinerat politikerinut (savanik) qaartartuneerinissamik siorasaaruteqartoqarnera pissutaavoq.
Politikerillu peqataanikuunnginnerat pissutigalugu aammaartumik innuttaasunut ataatsimiititsisoqalerluni.
Sumiiffinni teknikkikkut ajornartinnagu tusarniaalluni ataatsimiititsinerit toqqaannartumik livestream atorlugu aallakaatinneqassapput.
Innuttaasunut ataatsimiititsinerit toqqaannartumik aallakaatinneqarnerat uani malinnaaffigisinnaavatit.
