Politiit imigassamik inerteqquteqarnerup nalaani imigassaarniarnermik unioqqutitsinerit misissuiffigigaat

Nunatsinni kommunini sisamani imigassamik nioqquteqarneq januaarip februaarillu akornanni inerteqqutaareerluni tamarmik ammaqqipput.

Politiit imigassap matoqqanerata nalaani inunnik arlalinnik imigassamik nammineq inerteqqutaasumik tuniniaasunik tigusaqarsimallutik maanna nalunaarutigaat.

AAMMA ATUARUK Politiit oqarasuaataannut siarnguttorpassuusut: Sapaatip akunnerata naanerani siarngutiinnavinnissaat ilimagaarput

Politiit suliat, imigassamik inerteqqutaasumik tuniniaaneq pillugu inatsimmik unioqqutitsisut 17-it maanna misissuiffigileruttorpaat. Tamanna akiliisitsinermik kinguneqarsinnaasoq, politiit allapput.

-  Misissueqqissaarneq inunnut pineqartunut unnerluutiginninnermik kinguneqassappat taakku 1.000 koruunilikkaanik akiligassinneqarsinnaapput, kiisalu tuniniaanermi iluanaarutinik imigassamillu tuniniarniakkaminnik arsaarneqarsinnaallutik.

Politiit tusagassiuutinut nalunaarummi allapput.

Politiit Facebookimi quppernerit matutinniaraat

Kommuneqarfik Sermersuumi, Kommune Kujallermi Kommune Qeqertalimmilu imigassanik  nioqquteqarnerit sapaatit akunnerisa marluk matusa siorna matuneqarput.

Taanna coronavirusimik tuniluunnermut unikaallatsitsiniarneq aammali politiinit peqqinnissaqarfimmilu sulianut oqilisaassiniarneq pissutigalugit atulersinneqarpoq.

Inerteqquteqarneq januaarip ulluisa 26-anni atulersinneqarpoq. Tamanna qaammammusisoqarnissaanut, feeriarnermorsisoqarnissaanut soraarnerusutisisoqarnissaanullu tallimanngorneq sioqqullugu pivoq. Sapaatip akunnerata naanera taanna politiit ulappuffigingaatsiartaraluarpaat.

Qeqqata Kommuniani imigassamik nioqquteqarneq januaarip ulluisa aqqarnannit februaarip ulluisa aallaqqaataat ilanngullugu matoqqatinneqarpoql. Avannaata Kommunia nunatsinni kommunini kisiartaalluni imigassamik inerteqquteqarnermik atulersitsinngilaq.

Politiit imigassamik nioqquteqartoqarneranut suliat ilungersunartumik suliarigaat, politikommissærip, Jan Geislerip tusagassiuutinut nalunaarummi oqaatigaa.

- Imigassamik nioqquteqarnerup sassaallersinnaanerullu inerteqqutigineqarnera politiinut napparsimmavimmilu sulisunut covid-19-ip nunatsinni tuniluunnerpaaffiani allanik suliaqarnissamut piffissaqartitsisussaavoq. Innuttaasut ilaasa imigassamik inerteqquteqartoqaraluartoq imigassaarniaannarsimanerat Kalaallit Nunaanni Politiit ilungersunarluinnartutut isigaat.

Politiit sulianik 17-inik misissueqqissaarnermi saniatigut Facebookimi quppernerit arlallit imigassamik nammineq tuniniaaffiusartutut pasineqartut matuneqarnissaat qinnutigaat.

- Imigassamik inerteqqutaasumik nioqquteqarnermut suliat misissuiffigineqarnerat malinnaaffiginerallu ingerlatiinnarneqassaaq, imigassamimmi nioqquteqarnissamut sassaallersinnaanissamullu akuersissuteqarnissaq pisariaqarpoq, politiit allapput.