Politiit oqarasuaataannut siarnguttorpassuusut: Sapaatip akunnerata naanerani siarngutiinnavinnissaat ilimagaarput
Angerlarsimaffinni eqqissiviilliornerit, aqqusinermi eqqissiviilliornerit inuillu aalakoortut imminnut isumagisinnaanngitsut.
Kalaallit Nunaanni Politiit imigassamik nioqquteqarneq kommunini pingasuni sapaatini akunnerni kingullerni arlalinni inerteqqutaasimasoq, ammaqqinneqarmat ullormi siullermi suliassarpassuaqarsimapput.
- Pigaartunut siarnguttoqarpoq, pigaartut pisortaat, Bent Johnsen KNR-imut oqarpoq.
- Imigassap ammaqqinneqarnera malugisinnaalluarparput. Sapaatip akunnerata siuliani ullormi tassani suliassagut imigassartorsimanermut atassuteqartut ataatsimut isigalugit pingasuupput. Maannakkut suliagut, imigassartorsimanermut attuumassuteqartut 44-pput.
AAMMA ATUARUK Qeqqata Kommuniani imigassaq ammaqqimmat eqqissisimapput: Matulerisunik piareersimatitsilluaraluarpugut
Politiilli imerniartarfinni pisiniarfinnilu immiaaqqanik, viinik imigassanillu nioqquteqartoqaqqissinnaalernissaanut ulapinnissaminnut piareersimalluarsimapput:
Politiit ullormi kingullermi imigassartorsimanermut attuumassuteqartut ukununnga aggersarneqarput:
Angerlarsimaffimmi eqqissiviilliornerit 16-it
Angerlarsimaffimmi eqqissiviilliornerit meerartaqartut marluk
Inuit aalakoorpallaarlutik imminnut isumagisinnaanngitsut arfineq-pingasut
Aqqusinermi eqqissiviilliornerit tallimat
Imminut toqoriarnerit marluk
Paasissutissarsiffik: Kalaallit Nunaanni Politiit
- Imigassamik nioqquteqarnerup ammaqqinnerani suliassarpassuaqarnissarput ilimagereerparput, taamaammat sulisussagut amerlanerutippagut, Bent Johnsen oqarpoq.
Sapaatip akunnerata naanerani sulisoqarnerussasoq
Suliassarpassuillu suli qaangiutinngitsut, taassuma siulittorpaa:
- Sapaatip akunnerata naanissaata tungaanut suliassarpassuaqaannarnissarput ilimagaarput, taamaammat sulisussat amerlanerutippagut. Aamma nittaalartalimmik anorersuarnissaa aarlerisaarutigineqarnikuuvoq, tassunga aamma piareersimassaagut.
Kommuneqarfik Sermersuumi, Kommune Kujallermi Kommune Qeqertalimmilu imigassamik inerteqquteqarneq sapaatit akunnerisa marluk matuma siorna atulersinneqarpqo.
Taanna coronavirusimik tuniluunnermut unikaallatsitsiniarneq aammali politiinit peqqinnissaqarfimmilu sulianut oqilisaassiniarneq pissutigalugu atulersinneqarpoq.
AAMMA ATUARUK Angerlarsimaffimmi eqqissiviilliornerit imigassamik inerteqquteqarnerup nalaani ikinnerusut
Inerteqquteqarneq januaarip ulluisa 26-anni atulersinneqarpoq. Tamanna qaammammusisoqarnissaanut, feeriarnermorsisoqarnissaanut soraarnerusutisisoqarnissaanullu tallimanngorneq sioqqullugu pivoq. Sapaatip akunnerata naanera taanna politiit ulappuffigingaatsiartaraluarpaat.
Politimesterillu Bjørn Tegner Bayip oqarnera naapertorlugu imigassamik inerteqquteqarneq iluaqutaasimavoq.
- Piffissami suliassarpassuarnut angummassinnaajunnaaratarnissatsinniinnitsinni suliffeqarfiit inuiaqatigiinnut pingaaruteqartut illersorpai, politimesteri KNR-imut sapaatip akunnerani siusinnerusukkut oqarpoq.