Biilimik apuereerluni qimaasup videoliarineqarnera politiit saqqummersikkaat
Biili kalaallimik sakkutuumik Karupip timmisartoqarfiata eqqaani ataasinngormat unnukkut apuilluni toqutsisup videokkut nakkutilliissutikkut videoliarineqarnera politiinit saqqummersinneqarpoq.
Biilimik apuisoq aporsigamili ujaarineqalerpoq. Biili Peugeot 206-itut angissuseqarpoq saavatigullu aserorneqarsimalluni. Biili qasertuunngikkuni qasertumik sølvimik qalipaateqassangatinneqarpoq.
Politiit apuisumik nassaarinninnissaminnik neriuuteqarlutik nakkutilliissutikkut videoliarineqarsimasumik maanna saqqummersitsipput, videoliami biilimik apuisup takutinneqarnerata saniatigut varevogni qaqortoq apuisup piffissami tassani ingerlaffigisaatigoortoq aamma takutinneqarpoq.
Politiit oqarnerat naapertorlugu varevognimut tunngatillugu itinerusumik ajoraluartumik nassuiaasiisoqarsinnaanngilaq.
AAMMA ATUARUK Kalaaleq sakkutooq Danmarkimi aporneqarluni toqusoq
Viborgip politiivini pinerluttoqarsimaneranik paasiniaasartut pisortaata, Christian Toftemarkip biili pineqartoq pillugu paasissutissanik pingaartunik politiinut tunniussisoqarnissaa neriuutigalugu dr.dk-mut oqaatigaa.
- Innuttaasut pinerluuteqartup biilianik paasisaqarnissamut ikiuuteqquavut. Biilimut tunngatillugu pingaaruteqartunik allanik paasissutissaateqanngilagut, Christian Toftemark oqarpoq.
Videoliami varevogni qaqortoq biilini siullertut takuneqarsinnaavoq, politiit taassuminnga aquttoq takunnittuusimasinnaammat ujaaraat. Varevognimi biilimit apuisumik qaangerneqarsimasinnaavoq. Videoliami biilip tullia takutinneqartoq biiliuvoq qaamasoq, biililu taanna 22-nik ukiulimmik apueqqammissangatinneqarpoq.
Karupimi timmisartoqarfiup isaariaata eqqaani ataasinngornermi unnukkut nalunaaqutaq 20.30-p 20.50-illu akornanni apuilluni toqutsisoqarpoq. Biilimik apuisoq apuinermi kingorna avannamut Viborgip tungaanut ingerlavoq.
