Politiit ullormut nalunaarutaat: Politiit arnaq puigortunngortoq ujaaraat
Nanortalimmi arnaq 67-inik ukiulik arfininngormat ullup qiterarnerani periarfeeruppoq, takuneqaqqissimananilu..
Taamaattumik quit, naqqup-iluata initai, umiatsiat allallumi sumiiffigisinnaasai Nanortalimmi politiit alakkalaaqquaat. Taama Facebook-imut ippassaq unnukkut allapput.
Suli ujaasisoqartoq, Kalaallit Nunaata politiivini pigaartuisa pisortaat Aputsiaq Hansen ullaaq manna oqarpoq.
- Ujaasinerput ullumi ingerlatiinnassavarput, neriuppugullu nassaarissallutigu, taanna oqarpoq.
Arnaq 160 cm missaani angissuseqarpoq, tuattuulluni, takisuunik qeersaartunik nujaqarluni, qasertumik kavaajaqarpoq qaamasunillu koorpunik qarleqarluni.
Taanna arnaq 67-inik ukiulik arfinngornerup kingorna takusimagukku politiiniit oqaloqatigerusuppatsigit. Kalaallit Nunaanni Politiinut 70 14 48-mut sianersinnaavutit.
Ujaarineqartuni kisimiinngitsoq
Kalaallit Nunaata poolitiivisa taanna arnaq 67-inik ukiulik ulluni makkunani kisiat ujaarinngilaat. Aamma Nuummi angut 25-t 30-llu akornanni ukioqartoq ujaarineqarpoq.
- Nuummeersoq angut suli ujaarivarput, Aputsiaq Hansen oqarpoq.
Angut sapaatiummat eqqartuussivimmi sassartinneqartussaalluni politiinit qimaavoq, Politiit pigaartuisa pisortaa marlunngornermi ullaakkut oqarpoq.
Angut persuttaasimasutut pasineqartuuvoq, takuneqarunilu nammineerluni attaviginiarneqassanngilaq.
Kalaallit Nunaanni Politiinut 70 14 48-mut sianertoqassasoq innersuussutigineqarpoq.
