Politiikerit akuliutissallutik piareersimapput

Ilinniartitsisut sulisitsisuisalu isumaqatigiinniarnerisa ajalusoornerisa kingorna inatsisiliuussinissaq Inatsisartuni partiinit amerlanerussutilinnit isumaqatigineqarpoq.

Ilinniartitsisunik atorfinittussanik mattussinerup atorunnaarsinneqarnissaa pillugu KANUKOKA ippassaq nalunaarpoq, mattussinerup atorunnaarsinneqarnissaa siunertaralugu politikkikkut akuleruttoqartariaqartoq - taamalu isumaqarneq politikerinit isumaqatigineqarpoq.

- Politikkikkut akulerunnissaq kingullerpaatut qinigassaavoq, kisiannili una pisoq taama inuiaqatigiinnut attuumassuteqartigisoq, politikkikkut akulerunnissamik oqalunneq taperserparput, Siumup siulittaasua Aleqa Hammond oqarpoq.

Isumaqatigiinniarnernut politikkikkut akulerunnissaq Siumumit isumaqatigineqanngikkaluartoq, pisoq ima ilugersunartigilerpoq allaat politikkikkut akulerunnissaq avaqqunneqarsinnaajunnaarluni.

Politikkikkut akulerunnissaq Inuit Ataqatigiinnit taperserneqarsinnaasoq, Inuit Ataqatigiit politikkikkut oqaaseqartartuata, Aqqaluaq B. Egedep oqaatigaa.

- Ajornartorsiummut inerniliisoqartariaqarpoq, taamaattorli Inatsisartuni amerlanerusut isumaannik isumaqatigiittoqartariaqarnera Inuit Aqatigiinnit isumaqarpugut. Naalakkersuisulli inatsisiliuussissappata tamassumunnga isumaqataassaagut, Aqqaluaq B. Egede oqarpoq.

Akerulerunnissaq Demokraatinit aamma ajoqutissaqartinneqanngilaq.

- Politikkikkut akuleruttoqarnissaa Naalakkersuisunit aamma KANUKOKA-mit aalajangerneqarpat, tamassuma isumaqatiginissaanut piareersimavugut. Apeqqutaaginnassaarli politikkikkut akulerunneq qanoq ittoq qinerniarneqarnersoq. Demokraatiniillu isumaqarpugut, ajalusoortoqartillugu politikkikkut akulerunnerit ulluinnarsiutaassanngitsut, Demokraatineersoq Andreas Uldum oqarpoq.

Aamma Kattusseqatigiit Partiiata inatsisitigut akulerunnissaq isumaqatigaat.

- Ilinniartitsisut Naalakkersuisullu qanillattornissaat allatigut aaqqinneqarsinnaanngippat, Kattusseqatigiit Partiiannit isumaqarpugut, politikkikkut akuleruttoqartariaqartoq, Knud Fleischer oqarpoq.

Inatsisartuni partiit tamarmik politikkikkut akulerunnissamut isumaqataanngillat. Atassutip siulittaasua Gerhardt Petersen ima oqarpoq.

- Politikkikkut inatsisiliuussinissaq tapersersorlugu oqarsinnaanngilagut, tassami isumaqatigiinniutaasimasut imarisaat qanorlu illuatungeriit avissaaqqatiginersut ilisimannginnatsigu, Atassutip siulittaasua Gerhardt Petersen oqarpoq.