Politiit radiui qanganitsertut ilungersunartut
Politiit atortuminnik taarsersuinissaminnut namminneq akissaqanngillat, Folketingimulli ilaasortaq Aaja Chemnitz Larsen naapertorlugu danskit naalakkersuisuisa atortunut nutaanut akiliinissaanut maanna periarfissatsialaavoq.
- Kalaallit Nunaanni politiini nutaanik radiokkut attaveqatigiissutitaarnissatsinnut piffissami qanittunnguami aalajangiisoqassasoq neriuutigisaraara, Kalaallit Nunaanni politiini politimesteri, Bjørn Tegner Bay, oqarpoq.
Folketingimullu ilaasortaq Inuit Ataqatigiinneersoq Aaja Chemnitz Larsen naapertorlugu danskit naalakkersuisui aningaasaliinissamut piareeqqapput:
- Tassa danskit naalakkersuisui aningaasaliinissamut piareeqaneraramik - aningaasanummi inatsisisaq pillugu isumaqatigiinniarnerni taama neriorsorpaannga, Aaja Chemnitz Larsen oqaluttuarpoq.
Kalaallit Nunaannimi politiit atortorissaarutaat nungullarsimasuusut tamanit isumaqatigiissutaavoq:
- Maannakkut atortorisagut ima nungullarnikutigaat, qanittukkut kingoraartissaataaruttussaalluta, politimesteri oqarpoq.
Taassuma sulisumi isumannaatsuunissaat pillugu radiomik sanngeequtaat allat oqaluusererusunngilai. Taannali naapertorlugu radiokkut attaveqatigiissutit nutaat atorlugit politiit illoqarfiit akornanni oqaloqatigiittarnerat pitsaanerulissammat, tamanna pitsaaqutaasunut ilaassaaq.
Danskilli naalakkersuisui radionut nutaanut aningaasaliitinnagit, kalaallit oqartussat, soorlu peqqinnissaqarfik qatserisartullu atortorisaarutinut attaveqassanersut, Aaja Chemnitz Larsen napertorlugu qulaajarneqaqqaartariaqarpoq.
Taamaammat taassuma Naalakkersuisut aalajangeequllugit kimigiiserfigai.
- Naalakkersuisut peqatigalugit qulaarinninnissaq pingaarpoq. Aappaatigulli aamma kinguarsannginnissaq pingaarpoq, politiit uagullu tamatta isumannaatsuunissarput pingaartummat.
Politiimesterimulli politiit atortorissaarutitaarnissaat allanit tamanit pingaarneruvoq:
- Uagutsinnit atorneqarsinnaasunik radiotaarnissarput maanna kimigiisiutigaara, oqartussallu allat peqataassanersut piffissap takutikkumaarpaa, politimester Bjørn Tegner Bay oqarpoq.
Aaja Chemnitz Larsenip paragraf 37 atorlugu apeqquteqaataanut akissuteqarluni Naalakkersuisut siulittasuat Kim Kielsen allappoq.
Ataatsimoortumik radiukkut attaveqaqatigiittarnernut ilanngunnissamut apeqqut atorfilitsigoortumik politiillu oqaloqatigiinnermik periarfissanik aallarniivoq.
Sorlernik pisinissaq apeqqutaalluni atortut 10 millionit 15 millionillu koruunit akornanni akeqassapput.
