Polenip præsidentia: Sakkussanik Ukrainemut nassiussisarunnaarniarnitsinnik oqarneq paatsoorneruvoq
Polenip sakkussanik Ukrainemut nassiussisarunnaarniarneranik Polenip ministeriunerata oqarsimanera paatsuuinermik tunngaveqartoq, Polenip præsidentiata Andrzej Dudap oqatigaa.
Ministeriunerup Mateusz Morawieckip oqaasii paatsoorneqarluinnarput, Duda oqarpoq:
- Polenimi illersornissaqarfiup nutaanngorsarniarneqarnera pissutaalluni Ukrainemut sakkussanik nutaanik maannangaaq nassiussisinnaanngitsugut ministeriuneq oqarpoq, tamannalu nassiussisarunnaarniarnertut paasineqarpoq naak taamaanngikkaluartoq, Andrzej Duda tv-qarfimmut TVN24-mut oqarpoq.
Nunat marluk taakku akornanni pissutsit najummassimanarsisimasut, Dudap TVN24-mut nassuiaatigaa.
Ukraine karrinik avammut tunisaqarniarnermi karrit nunakkut assartorneqarnissaat Ukrainep ujartoraa Zelenskyj-p Naalagaaffiit Peqatigiinni oqalugiarami ilaatigut oqaatigimmagu, Europap kangisissuani nunat arlallit quarsaarput.
Naak EU-p karrinik Ukrainemit eqqusseqqusiunnaarnera sapaatit akunnerata siuliani atorunnaarsinneqaraluartoq Polen Ungarn Slovakialu peqatigalugit atorunnaarsitsinianngitsoq, Zelenskyj-p ilaatigut oqaatigaa.
Morawiecki Polenimi tv-qarfimmut TVN24-mut ima ilaatigut oqarpoq:
- Ukrainemut sakkussanik nassiussisarunnaarniarpugut, Polenimmi sakkussiaatai nammineq maanna nutaanngorsarniarpavut.
Ukrainep karrinik avammut tunisaqarsinnaanissaa pillugu aaqqiagiinngissuteqartoqarnera pissutaalluni taama oqartoqartoq, tusagassiutini ilaatigut nalilerneqarpoq.
