Polarkode atuutilersinneqartoq
![](/sites/default/files/styles/image_934x467/public/article_images/skib_arktisk_nasa_kathryn_hansen.jpg?itok=VhJDq5cE)
Naalagaaffiit Peqatigiit imaatigut angallanneq pillugu suliniaqatigiiffiata, IMO-p, Issittumi umiarsuit angallannerannut malittarisassiai, Polarkodemik taagorneqartut, januaarip aallaqqaataani atuutilerput.
Issittup imartaatigut nutaanik angallavissaqalernera Issittullu takornariarfiginissaanik soqutigineqaleraluttuinnarnera pissutigalugu umiarsuit nassiussanik usisut ilaasartaatillu amerliartuinnartut issittup imartaatigut angalasalerput.
Umiarsuarnillu angallavigineqaleraluttuinnarnerata sillimaniarnermut issittumilu avatangiisinut sunnertiasunut akornutaannginnissaa Polarkodekkut qulakkeerniarneqarpoq.
Malittarisassat nutaat ilaatigut atisanut, annanniutinut issittumilu umiartortut ilinniartitaanerinut piumasaqaatinik arlalinnik imaqarput.
AAMMA ATUARUK Umiarsuit takornariartaatit Issittumi angalasarnerat navianaateqartoq
Aamma uuliamik, eqqagassanik assigisaanillu imaanut eqqaanermut malittarisassat sukannernerusut atuutilerput. Sikuiuitsoq kujallermi uuliap oqimaatsup mingutsitsinerungaartullu HFO-p orsussatut atornissaa aamma inerteqqutigineqarpoq.
Danskit naalakkersuisuisa uuliap oqimaatsup Issittumi tamanut inerteqqutigineqalernissaanik suliniuteqarnissaat Danmarkimi Umiarsuaatillit peqatigiiffiata siorna septembarip qaammataani siunnersuutigaa.
Taamatullu siunnersuuteqartoqarnera Royal Arctic Linemit taperserneqarpoq, Pinngortitarlu pillugu nunarsuaq tamakkerlugu suliniaqatigiiffiup WWF-ip isumassarsiaq nuannaarutigaa.
Uuliallu oqimaatsup orsussatut atornissaanut inerteqquteqarneq Sikuiuitsumut kujallermuinnaq maanna atuuppoq, uuliallu oqimaatsup Issittumi atorneqannginnissaanut Polarkodekkut kaammaattuutigineqarluni.
AAMMA ATUARUK Issittup imartaani isumannaallisaanermut malittarisassat nutaat