Polar Seafoodip timersortartut aningaasaliiffiginiarai

Kalaallit Nunaanni suliffeqarfiit namminersortut annersaat Elite Sport Greenlandimik nutaatut aningaasalersueqataalerpoq. Timersornikkut pikkorissunik piukkunnaatilinnillu taamaasilluni ineriartortitsisoqarnerulersinnaassaaq.

Allattoq Mads Lynge

novembarip 17-at 2024 13:10

Polar Seafood Elite Sport Greenlandimut ukiunut marlunnut atuuttussamik aningaasaliissuteqarnissamik isumaqatigiissusiorpoq.

Isumaqatigiissut Elite Sport Greenlandip suliniutaanut naapertuuttuuvoq, Kalaallit Nunaanni piukkunnaatilinnut kiisalu pikkorivissortunut ineriartortitsinermut ukkatarinninnermut.

Elite Sport Greenlandip tusagassiorfinnut nalunaarutaani tamanna atuarneqarsinnaavoq.

Elite Sport Greenland suliniaqatigiiffiuvoq Namminersorlutik Oqartussat suleqatigalugit timersornermi pikkorissunik piukkunnaatilinnillu pisinnaasaannik ineriartortitsinermut sulialik, timersortartut nunat tamalaat unammiuaarneranni peqataasinnaanissaannik aqqutissiuisoq.

Aamma atuaruk Timersornermut naalakkersuisoq: Pikkorivissunut aningaasaqarneq pitsaanerulissappat ataatsimoorussamik pilersaarusiortoqartariaqarpoq

Elite Sport Greenlandip Namminersorlutik Oqartussanit, Tips- og Lottomidleriniit, allaniillu aningaasaliissutit aqutarai agguassisarlunilu.

Nunatsinnilu suliffeqarfiit namminersortut annersaannit maanna aningaasaliisoqarpoq.

- Siunissamut Kalaallit Nunaanni timersornikkut aningaasaliiffiginnissalluta periarfissatsialattut isigaarput, Bent Salling, Polar Seafoodimi pisortaq taama oqarpoq.

Aningaasaliissutit pisariaqartinneqaqisut

Nunatsinnilu timersornikkut aningaasaliisarnerit pisariaqartinneqartorujussuupput.

Timersoqatigiit assigiinngitsut aningaasaliisoqarnerunissaannik kissaateqarnertik ukioq manna arlaleriarlutik oqaatigikuuaat.

Assammik arsartartut kattuffiat TAAK, isikkamillu arsaannermi kattuffik KAK taakkununnga ilaapput. Taakkumi aningaasaliissutit ikippallaarnerat pissutigalugit aaqqissuussanik assigiinngitsunik taamaatitsiinnartariaqarsimapput.

Kattuffinni aningaasaqarneq naatsumik oqaluttuaralugu

Timersortartut peqatigiiffiisa kattuffii arlalit aningaasaqarnikkut kipiluttunartorsiorput.

Aningaasarliorneq kattuffiit pingasut tassa Greenland Table Tennis Federationip (GTTF), Kalaallit Nunaanni Volleyballertartut Kattuffiata (KVK) aamma Kalaallit Arsaattartud Kattuffiata (KAK) Arctic Winter Gamesertoqarnerani ukioq manna marsimi peqataanngitsoorneranik kinguneqarpoq.

Timersortartut peqatigiiffiisa kattuffiata ilaat Badminton Kalaallit Nunaat (BKN), nunarput sinnerlugu Arctic Winter Gamesimi peqataatitsisarpoq, ukioq manna aamma taamaaliorput.

Susassaqartitsinerli naleqartoq BKN-imi aamma malugineqarsinnaavoq, taakkulu pikkorivissunik ineriartortitsinissamut amerlanernik aningaasaliivigineqarusukkaluarput.

Timersoqatigiit Assammik Arsartartut Kattuffiata (TAAK) siulittaasua aningaasanik amerlanernik tuneqqullutik politikerinut oqariartuuteqarpoq.

Arnat nunanut allanut unammisartut VM-imi peqataaqqammersut sungiusaasui ukiup aallartilaarnerani kattuffimmit soraarsinneqartariaqarsimapput.

Pikkorivissortaqarnerup misigissutitsinnut nanutullu ataatsimoortutut misiginitsinnut pingaaruteqarnera Elite Sport Greenlandip erseqqissarpaa.

Nunatullu ataqatigiinneq misigisanik immikkuullarissunik inuiaqatigiinnilu ataatsimuussusermik pilersitsisarpoq.

Allisiguk

Elite Sport Greenlandillu Polar Seafoodimik isumaqatigiissusiortoqarnera timersortartut siunissami periarfissagissaarnerulernerattut aamma isigaa:

- Ataatsimut piukkunnaatillit tapersersorneqarnissaat eqqortumillu sinaakkuteqarnikkut ilaatigut angusaqarsinnaanissaannut qulakkeernissaa qanillattorsinnaallugu, Elite Sport Greenlandimi siulittaasoq Angutinnguaq Hegelud-Tittussen oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.