Polar Seafood naatsorsuutimigut angusarissaartoq
Sinneqartoorutit akileraarutinik akiliinnginnermi 203 millionit koruuningajaapput, aalisariutaatillillu namminersortut taakku Nunatta karsianut siorna 215 millionit koruuninik iluaqusiillutik. Taakkununnga ilaallutik suliffeqarfiup isertitaminit akileraarutai, qalerallit raajallu akitsuutaat sulisullu a-mik akileraarutaat.
Polar Seafoodimit oqaatigineqarpoq, angusarissaarnerminnut patsisaasoq, piffissaagallartillugu avaleraasartuunik aalisalernissamut 300 millionit koruuninik aningaasaliisimagamik, aamma ingerlatsilluarnertik pissutaaqataasoq.
Maajip 28-ani ukiumoortumik ataatsimeersuarnermi siulersuisut siulittaasuat Henrik Leth naammagisimaarinnippoq.
- Ataatsimoortumik kaaviiaartitanit katillugit 2,5 milliardiusunit 200 millionit sinnilaarlugit sinneqartoorneq pisariaqartinneqartumik qaffasissuseqarpoq. Uagut ingerlatatsinni amerlasuunik aningaasaliisarnikkut nunanut tamalaanut unammillersinnaanissarput ajornannginnerulertarpoq, taanna oqarpoq.
- Taamaattumik suliffeqarfiit aalisarnermik ingerlataqartut, ingerlatamik immikkoortuinik tamakkiisumik isiginninniartarnissaat pingaaruteqarpoq, taamaaliornikkummi imminut akilersinnaasumik ingerlatsinissaq anguneqarsinnaasarmat, Henrik Leth oqarpoq.
Siulersuisuni siulittaasup ilanngullugu oqaatigaa, tullianik ukiumoortumik ataatsimeersuarnissami taama sinneqartoortiginissaq ilimaginagu, niuernikkummi allannguuteqartuaannarmat aamma inatsisitigut atuisunillu piumasaqaatit allanngortinneqakkajuttarmata.
Avaleraasartoorniarnermit isertitat Polar Seafoodip angusarissaarneranut kisimik aalajangiisuunngillat, aningaasanulli inatsisip siorna ukiakkut isertitatigut aningaasartuutitigullu oqimaaqatigiissinneqarnera aamma pissutaaqataavoq.