Polar Seafood sinneqartoorujussuarpoq
Polar Seafood-immi naatsorsuutaasa 2012-meersut takutimmassuk aatsaat taama pitsaatigisunik angusaqartut 203 million koruuninik sinneqartooruteqarlutik. Suliffeqarfissuaq pisortat ingerlataannut assigiinngitsunut 225 milliner koruuninik isertitaqarsimavoq.
203 millioner koruunit akileraaruteqanngillat akileraarut ilanngaatigigaanni 151 millioner koruuniupput. Sinneqartoorutit 7,8 procentiupput, naalagaaffeqatigiit iluanni annertunerpaalluni. Suliffeqarfissuup nammineq aningaasaatai 900 million koruuningajaapput.
- Kalaallit Nunaanni Nunani Avannarlernilu allani taamaaqatitsinnut naleqqiutissagutta assut ingerlalluarpugut, tamannalu assut naammagisimaarparput siulersuisut siulittaasuat Henrik Leth naatsorsuutit inerneri pillugit oqarpoq.
Polar Seafood tusagassiuutinut allappoq, raajat pisassiissutaasartut annikilliartorfiini suliffeqarfiup tunisassiassat nutaat ujartornissaat pingaartikkaa, ilanngullugulu tikkuarlugu nunami tamarmi aalisarnermik aallutaqartut tamarmik taamaaliortariaqartut.
Siunissaq ungasinnerusoq isigalugu kalaallit aalisakkanik tunisassiortuisa nunarsuarmi inissisimaffitsik tigummiinnassagunikku aaqqissuussaanertik nutartertariaqarpaat. Pisassiissutaasartut appariartornerini unammilleqatigiinnerullu sakkortusingaluttuinnarfiani pingaaruteqarluinnarpoq pitsaanerpaamik aalajaatsumillu isumaqatigiissutit iluanni ingerlaaseqarnissaq, Henrik Leth oqarpoq naqissuserlugulu:
- Aalisarneq ukiorpassuarni aggersuni suli inuussutissarsiutini aningaasarsiornikkullu pingaarnerpaatut inissisimasussaavoq.
Aningaasaliinerni pingaarnerpaasimavoq piginneqatigiiffimmi East Greenland Codfish A/S-imi aktiaatinik amerlanerussuteqalerneq, tunisassiorfik taanna aalisakkanik soorlu ammassannik, ammassassuarnik makrel-inillu tunisassiortarpoq. Taamatut aningaasaliinerup suliffeqarfissuaq aalisakkanik sinerissap avataaniittunik tunisassiornissaanut aqqutissiuutissuaa, taamatullu tunisassiorneq taamaalilluni Kalaallit Nunaanni ineriartortinneqarluni aallartippoq.
Aningaasaliiffigineqartoq pingaarutilik alla tassa Ruslandimi qerititsiveqarfissualiorneq, nunami tunitsivittut suli alliartortumi. Nammineq tunisassiami saniatigut Polar Seafood-ip qerititsivik taanna Moskvamut ungasinngitsumiittoq tunisassiortunut allanut aamma iluaqusersuutigaa. Taamaalilluni Polar Seafood aalisakkanik tunisassiortuni annerpaanut ilannguppoq.
