Polar Oil: Pinngortitaq paariniarlugu puukunik utertisalerneq ingerlalluartoq

KNI-p suliniutaa"KNI qorsuunerusoq"-mi taasaat plastikinik puukunik utertinnikut 3 koruuninnassutigineqartarnissaa siorna novembarimi pilersippaa, taamaaliorneq plastikkinik pinngortitamut eqqaasoqannginnerulernissaanik anguniagaqarneruvoq.

Perrassaatit puukui utertinneqartartut suli amerliartuinnartut, Polaroil tusagassiuutinut allapput.

- Perrassaatit dunkitaannik utertittakkat tigusakkagut amerligaluttuinnarput. Tamanna assut nuannerpoq tusarluarnarlunilu, tassami pinngortitap eqqiluitsuutinneqarnissaa tamanut iluaqutaasussaavoq, Polaroilip pisortaa, Githa Brask Olsen, oqarpoq.

Perrassaatit pisiarineqartut puukui affai utertinneqartarput

Utertitsisalerneq siorna atuutilerneraniit puukut 5.458-it maannamut utertinneqarsimapput. Pisiarineqartartut affaasa missaa uterteqqinneqartarput.

- Naak utertitsisinnaaneq ukiorluinnartoq aallartikkaluarlutigu assut angusarissaarpugut, qularnanngilarlu dunkit ilai suli apummiissasut, Githa Brask Olsen ilisimatitsivoq.

- Suliniuterput suli nittarsaattuassavarput. Allagartarsuarnik ikummatissaasivinni Pilersuisullu pisiniarfiini tamani nivinngartuinitta saniatigut uuliaarniartut namminersortut aamma aperinikuuagut utertitsisinnaaneq pillugu allagartamik nivinngaanermikkut nittarsaaqataasinnaanersut.

Perrassaatip puukui allaanerit aamma utertinneqarsinnaapput, kisianni 3 koruuninnassutigineqarsinnaanngitsut, Polaroil ilisimatitsivoq.

AAMMA ATUARUK Plastikkinik taama eqqagaqartiginera tupigusuutigaat