Piujuaannartitsisumik aalisarneq niuerfinni pingaartinneqarneruleriartortoq

Aalisakkat nunatsinni pisat aalisartunit aningaasarsiutaalluarput. Taakkulu avammut tunineqarnerat nunatta iluanaarutigilluartarpaa. Nunattami avammut tunisaasa 95 procentiisa missaat aalisagaapput.

Naalakkersuisut aningaasaqarnikkut ingerlatsineq pillugu nalunaarutaat 2020-meersoq naapetorlugu, aalisakkat avammut tunisat nunatta karsianut milliardinik tallimanik isertitsissutaapput.

AAMMA ATUARUK Aalisartut kattuffiat: Sinerissap qanittuani qaleralittassiissutit amerlanerusariaqarput

Isertitsissutaajuaannassappatalu piujuaannartitsinermik aalisarneqarnissaat aalisakkanik nunarsuarmi pisisartut piumasarileraluttuinnaraat, Royal Greenlandip malugaa.

- Pisisartut aalajangerneranni piujuaannartitsineq tunngaviusorujussuusoq massakkut maluginiarparput. Taamaattumik tamakkua pisiniarfiit aamma sutorniartarfiit assigiinngitsunik massakkut pisiniartartunut apersuisalernikuupput, taavalu suna pingaartinneqarnersoq apeqqutigineqartarluni. Tassanilu piujuaannartitsinerup pingaassusia kissaatini qaffakkaluttuinnarpoq, Jens K. Lyberth oqarpoq.

RG: Piumasaqaatit sakkortusiartorput

Namminersorlutik Oqartussat suliffeqarfiutaanni kaaviiaartitaqarnerpaap, sulisoqarnermi attaveqaqatigiinnermilu pisortaata, piujuaannartitsisumik aalisartoqarnissaa neriuutigaa, kinguaariillu tullii aalisartuusinnaanissaat aamma pingaartillugu.

Piujuaannnartitsisoqanngippallu niuerfiit siunissami pisiumajunnaarsinnaasut Jens K. Lyberth isumaqarpoq.

- Piumasaqaatit sakkortusiartortillugit niuerfinni aalajangersimasuni tunisisinnaaneq piffissaq ungasinneq isigalugu unitsinneqariataarsinnaavoq. Pisisartut oqassappata piujuaannartitsinermut aalisarnermut tunisassiornermullu pissutsit taakkua timitalerneqarsinnaanngippata siunissami pisiffigisinnaanngilassi. Taanna ilimanartorujussuuvoq, malunnarami massakkut aamma pisiniarfiit assigiingitsut allatigut pisisartut piumasaqaataat timitalerniarlugit aamma suliniuteqarmata.

Royal Greenlandip tunisassiai ilaatigut nunatta kitaani raajat, nunatta kitaani nipisat suaat nunattalu kitaata avataani qaleralittat piujuaannartitsisumik aalisartoqarneranik, MSC-mik ilisarnaateqarput