Pituffiup eqqaani eqqakkat ulorianartut nunamut matoorunneqarput

Eqqakkat ulorianartut 3500 tonsinik oqimaassuseqartut nunaminertamut matoorunneqarput Danmarkimut nassiunneqarsinnaassinnaanngimmata EU-mi malittarisassat malillugit EU-mut eqqussinissamik inerteqquteqarmat.   

Eqqakkat ulorianartut naatsorsuutigisamit 70-eriaammik annertunerupput.

- Ajorluinnaqqissaarpoq. Taama erseqqitsigisumik oqarpoq avatangiisinut illersuiniaqatigiiffimmi Avatami siulittaasoq Mikkel Myrup Avatangiisinut Naalakkersuisup Mala Høy Kukop akissuteqaataa atuareerlugu.

AAMMA ATUARUK Dundasimi saliinissaq ataatsimiissutigineqartoq

Inatsisartunut ilaasortaq Anthon Frederiksen paragraf 37 naapertorlugu Pituffimmi eqqakkat ulorianartut 3500 tonsinik oqimaassuseqartut pillugit Avatangiisinut Naalakkersuisumut apeqquteqarpoq.

 Avatangiisinut Naalakkersuisup akissuteqaataani atuarneqarsinnaavoq, issuaaneq aallartippoq:

 - Naalakkersuinikkut isumaqatigiissut naapertorlugu saliisoqartoq, nunamerngup "Eqqakkatut ulorianartutut" immikkoortinneqartup Danmarkimut nassiunnagu Uummannatoqqami imaanit illuarlugu immikkoortinneqarnera eqqaassanngikkaanni. EU-mi malittarisassaq, nunaminermik EU-mut eqqussinissamik inerteqquteqarfiusoq tamatumunnga pissutaavoq,  issuaaneq naavoq.

Eqqakkatut ulorianartutut taasaq 3500 tonsinik oqimaassuseqartoq Uummannatoqqamiippoq.         

-  Nunamineq 3500 tonsiusoq assanneqartoq eqqakkatut ulorianartutut immikkoortinneqarpoq avatangiisinut naalakkersuisoq allappoq nangillunilu: 

-  Nunamineq mingutsinneqarsimasoq nunap qeriuaannartup ataaniitinneqarpoq silaannaallu allanngoratarsinnaanissaa ilanngullugu eqqarsaatigineqarsimavoq, Avatangiisinut Naalakkersuisoq allappoq.

AAMMA ATUARUK Uummannatoqqami avatangiisinik saliinerup killiffia Antuup paaserusukkaa

2011-mi Avatangiisinut Naalakkersuisoq Anthon Frederiksen aamma Danmarkimi Avatangiisinut ministeriusoq Karen Ellemann eqqakkanik saliinissamik isumaqatigiissuteqarput, saliinissamullu aningaasat 40 millionit koruunit atorneqarput. 

Eqqakkanik saliiineq 2012 sioqqullugu Naalakkersuisut aamma Avatangiisinut ministereqarfik Danmarkimiittoq isumaqarsimapput eqqakkat ulorianartut 50 tonsiusut eqqakkalli ulorianartut 3.500 tonsinik annertutigipput.

Taamaattumik Inatsisartunut ilaasortap Anton Frederiksenip, Naalakkersuisunut ilaasortaanerata nalaani Pituffimmi saliinissamik isumaqatigiissuteqartup piumasaraa Naalakkersuisut isumaqatiginniarnertik aallartittariaqaraat.

- Isumaqarpunga massakkut Naalakkersuisut suliassaq qaqeqqillugu danskit naalakkersuisuinut isumaqatiginiarneq aallarteqqinneqartariaqartoq aaqqiisoqarnissaa eqqarsaatigalugu, Anthon Frederiksen oqarpoq.

Malittarisassat arajutsisimagaat

EU-mut eqqakkannik eqqusseqqusinnginnermik EU-mi malittarisassaqarnera Naalakkersuisut ilisimasimanngilaat  tamannalu avatangiisinut illersuiniaqatigiiffiup Avatap siulittaasuata isumakuluutigalugulu eqqarsarnartoqartippaa.

- Eqqakkanik ulorianartunik imaaliallaannarluni EU-mut assartuisoqarsinnaannginneranik ilisimasaqannginnermik oqarneq eqqumiippoq, Mikkel Myrup Avataq oqarpoq.

Eqqakkanik ulorianartunik EU-mut eqqusseqqusinnginneq tupaallaatigineraa Mikkel Myrupimut apeqqutigineqarmat taanna oqarpoq, eqqakkanik ulorianartunik EU-mut eqqussisinnaanermut malittarisassat sukannersuusut tamannalu Namminersorlutik Oqartussat nalunngissimasussaavaat, Mikkel Myrup oqarpoq.

Avataangiisinut Naalakkersuisoq Mala Høy Kuko KNR-imit oqaaseqartinniarneqaraluarpoq tamannalu iluatsissinnaasimanngilaq.