Dundasimi saliinissaq ataatsimiissutigineqartoq
Nunamut Namminermut, Pinngortitamut Avatangiisinullu naalakkersuisoq, Anthon Frederiksen, Dundasimi saliinissamut tunngasumi suliami siornatigut ataatsimeeqatigiinnermut malitseqartitsilluni danskit Miljøministerianik, Troels Lund Poulsenimik Pingasunngormat decembarip 16-ani ataatsimeeqateqarpoq.
- Suliaq manna Nunatsinni naalakkersuinikkut ingerlatsinermut tunngatillugu annertuumik soqutigineqarpoq. Taamaammat assut nuannaarutigaara miljøministerip, naak silap allanngoriartornera pillugu ataatsimeersuartoqaraluartoq, piffissaqarfigimmagu ataatsimiinnissarput, Anthon Frederiksen oqarpoq nangillunilu:
-Ataatsimiinnermi isumaqatigiippugut suliaq pillugu januaarip aallartisimalernerani naapeqqissalluta. Qamannga pisumik neriuutigaara kissaatigalugulu, oqaloqatigiinnerit kinguneqartussamik angusaqarusussuseqarluni ingerlanneqassasut, eqqakkanik saliinissaq pillugu atasinnaasumik aaqqiissuteqarnissaq siunertaralugu, tassami eqqakkanit taakkunannga, Dundasimi arlaqartuni iginneqarsimasunit, ukiuni 50-ini kingullerni akuutissat ulorianartut avatangiisinut pinngortitamullu akuersaarneqarsinnaanngitsumik aniarusaarsimapput.
