PITUFFIK Pituffimmut tunngatillugu misissuititsineq kinguaattoortoq

Pituffimmut kiffartuussinissamut isumaqatigiissusiornermut tunngatillugu Namminersorlutik Oqartussat eqqartuussissuserisumit misissorneqarnerat kinguaattoorpoq.

Tamanna Sara Olsvigip §37 naapertorlugu apeqquteqaataa Naalakkersuisut siulittaasuannit akineqarnerani paasinarsivoq.

Kinguaattoornermut pissutaasoq tassaavoq eqqartuussissuserisoq Ole Spiermann, siornatigut Namminersorlutik Oqartussani inatsisilerinermut tunngasunik suliaqartarsimasoq, eqqartuussissuserisunut ileqquusut pillugit maleruaqqusat malillugit misissuinermik aallartinneqareersumik isumaginnissinnaanngitsutut nalilerneqarmat. Advokatnævnimiillu misissorneqassalluni.

Aamma atuaruk Kielsen eqqartuussissuserisut suliaat pillugu: Aviisimi atuarsinnaavarsi

Danmarkimi eqqartuussissuserisutut suliffeqarfiup Bruun og Hjejlep, Ole Spiermannip piginneqataaffigisaata, eqqartuussissuserisutut suliffeqarfik alla suliamut soqutigisaqartumut sinniisuusoq peqatigalugu, Ole Spiermannip misissuinermi siuttuunera eqqartuussissuserisutut ileqqorissaarnissaq pillugu malittarisassanut naleqquttuunersoq apeqquserpaa. Advokatnævnillu akissuteqarnissaa maanna utaqqineqarpoq, naatsorsuutigineqarlunilu qaammat una akineqassasoq.

Bruun & Hjelje Advokatnævnimit taperserneqarpata Namminersorlutik Oqartussat misissorneqarnerat piaartumik aallarteqqissasoq Kim Kielsenip akissutaani erserpoq.

Aamma atuaruk Aviisi: Namminersorlutik Oqartussat Pituffik pillugu misissuisussaat aajuna

Misissuisitsineq pereerpat inernerit Inatsisartunut tamanullu saqqummiunneqarnissaat Kim Kielsenip ammaffigalugu aamma allappoq.

- Tamanut saqqummiussinermi paasissutissat ilaannik isertuussisoqartussaanersoq pillugu isummersortoqarumaarpoq. Aamma nunanut allanut sillimaniarnikkut politikkeqarneq pillugu eqqarsaatit, nunanullu allanut pissaaneqartunut pissutsit pingaaruteqalersinnaapput, soorlu aamma naliginnaasumik nipangiussisussaatitaaneq matumani pineqartoq eqqarsaatigalugu, Kim Kielsen Sara Olsvigimut akissummini allappoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl