PITUFFIK Pituffik pillugu sulineq partiinit iluarineqanngilaq

Partii Naleqqamit Nunanut Allanut Sillimaniarnermullu Ataatsimiititaliami ilaasortap, Per Rosing-Petersenip, nalunaarusiaq atuarlugu aallartiinnarlugu eqqartuussissuserisup Ole Spiermannip misissuisimaneranut apeqqusiivoq.

- Suliaqarnissamut sinaakkutissat Naalakkersuisut Ole Spiermannimut suliakkiinerminni tunngavii apeqquserneqartariaqarput naammannersut. Suliat tamakkiisumik qulaajarneqarnissaanik siunertaqarniaraanni, Per Rosing Pedersen oqarpoq.

Aamma atuaruk Qujaukitsoq: Atorfilinnik soraarsitsisoqarnavianngilaq

Ilinniarfik

Demokraatit aamma isornartorsiuipput. Pituffimmi suliariumannittussarsiuussinermi piumasaqaatit allanngortinneqarnerini suliarineqarnera Nunanut Allanut Sillimaniarnermullu Ataatsimiititaliami ilaasortap Justus Hansenip sakkortuumik isornartorsiorpaa.

- Pisoq una siunissami uteqqinneqannginnissaanut ilinniarfioqaaq. Soorunami misissorluassavarput, Justus Hansen oqarpoq.

Aamma atuaruk IA: Aleqap akisussaaffik qimarratigisinnaanngilaa

Nakkutiginninneq

Suliap ingerlasimanera Siumukkunnit aamma naammagisimaarneqanngilaq. Nunanut Allanut Sillimaniarnermullu Ataatsimiititaliami ilaasortap, Vivian Motzfeldtip, kukkuluttortoqarsimanera avaqqunneqarsinnaagaluartoq isumaqarpoq. Inatsisartut Naalakkersuisunik nakkutiginninnerunissaat taassuma ujartorpaa.

- Isumaqarpunga Naalakkersuisut Inatsisartullu sulinerat imminnut qanittumik ingerlaqatigiisinneqartariaqartut pingaartumik pisumi imaattumi, inuiaqatigiinnut tamanut attuisumut. Aningaasatigullu annertoorujussuarmik Nunatsinnut sunniuteqarfiusumi, Siumut sinnerlugu Inatsisartunut ilaasortaq Vivian Motzfeldt taama oqarpoq.

Atassutikkunninngaanniit oqaaseqartitsinissaq KNR-ip sulissutigaa.

Aamma atuaruk ATAATSIMUT ISIGALUGU Pituffimmi kiffartuussinissamik isumaqatigiissutip annaaneqarnera