Pituffik IA: Aleqap akisussaaffik qimarratigisinnaanngilaa
Tamatumani Aleqa Hammond angisuumik akissussaaffeqartoq, Inuit Ataqatigiit siuluttaasuat Sara Olsvig isumaqarpoq.
- Takusinnaavarput nalunaarusiami naalaakkerasuisut siulittaasuusimasup taamani piumasaqaatit amerikarmiunut allanngortiterneqarniarniarnerannik ilisimasaqarsimasoq taamaamallu erseqqissumik oqartoqarsinnaavoq taamani naalakkersuisut siulittaasuusimasup politikikkut akisussaafini uani naammassisimanngilaa, Sara Olsvig taama oqarpoq.
Aamma atuaruk Aleqa Hammond: Oqaaseqarfigerusunngilara
Nalunaarusiami erserpoq suliaq aallartiinnartoq Aleqa Hammondip akisussaaffik atorfilittanut tunniussimagaa politikikkut suliassatut nalilernagu, soorlu nalunaarusiami ima allassimasoqartoq.
- Aleqa Hammond nassuiaavoq piumasaqaatit oqaasertalersornissaanik nalinginnaasumik suliaqartussaanani. Allaffissornikkut isumaqatigiinnianerupput atorfillit isumagisassaraat.
Tassanilu Naalakkersuisut siulittaasorisimasaat kukkusimasoq Sara Olsvig isumaqarpoq.
- Naalakkersuisut siulittaasuattut taamanili soorunami politikkikkut qanimut aammalu aalajangiiffissatut naalakkersuisoqatiminut saqqummiussisussaasimagaluarpoq uanga isumaga malillugu.
Nalunaarusiami Nunanut Allanut Tunngasunut naalakkersuisoqarfimmi pisortaq piumasaqaatinik akuersisimanini peqqutigalugu akisussaatinneqarpoq.
Aamma atuaruk Danskit nunanut allanut ministeriat oqaaseqarumanngilaq
Nunanut Allanut pisortaqarfimmi pisortamut kinguneqartitsisoqassanersoq Sara olsvig
isummerffigerusunngilaa. Naalakkersuisulli akisussaasuusut erseqqissarpaa.
- Naalakkersuisut akisussaaffik tigummivaat aamma taamani naalakkersuisut siulittaasuusimasup akisussaaffik tigummivaa.
Nalunaarusiaq nutaaq
Nalunaarusiaq arlaannaanulluunniit attuumassuteqanngitsuusutut Sara Olsvigip nalilersinnaanngilaa, aammalu politikkikkut akisussaaffik inissinniassallugu nutaamik nalunaarusiortoqarnissaa piffissanngornerarlugu.
- Suli isumaqarpunga misissugassaqartoq arlaanaanulluuniik attuumassuteqanngivittumik pisut tamaasa misissorneqassappata taava sooruna naalakkersuisut nammineq aalajangissanngilaat sorpiaat misissorneqassanersut. Politikikkulli akisussaaffimmik aamma tigummiaqarneq annertunerusumik misissorneqarani taannalu amigaataasutut oqaatigineqarsinnaavoq, Inuit Ataqatigiit siulitaasuat Sara Olsvig taama oqarpoq.