PITUFFIK Aleqa Hammond: Oqaaseqarfigerusunngilara
“Oqaaseqarfiginianngilaa.”
Maanna naalakkersuisuusut suliariumannittussarsiuussinermut tunngatillugu suliap ingerlanneqarsimaneranik eqqartuussissuserisumit misissuisitsinerat KNR-imit ippassaq oqaluttuarineqareersoq Aleqa Hammondip allaffeqarfiani pisortaq, Kenneth Rasmussen, taama oqarpoq.
Misissuinermi tassani Aleqa Hammond politikkikkut piginnaatitaanerminik unioqqutitsisimasutut pinngitsuutinneqarpoq. Tamanna KNR-ip misissuinermi allagaatinik takunnikkumalluni qinnuteqaateqarnerata kingorna paasinarsivoq.
Misissuineq naapertorlugu Pituffimmi kiffartuussinissamik isumaqatigiissutip suliariumannittussarsiuunneqarneranut malittarisassat allanngortinneqarnerat tamatumalu Nunatsinnut qanoq kinguneqarsinnaanera pillugu Aleqa Hammond Naalakkersuisut siulittaasuata naalakkersuisoqarfiani aammalu Nunanut allanut pisortaqarfimmi atorfilittanit ilisimatinneqarsimanngilaq.
Aamma atuaruk Nunatsinnit siunnersuutaasoq tusaanngitsuusaarsimagaat
Aamma atuaruk Kai Holst Andersen akisussaanerpaavoq
Misissuinerulli aamma takutippaa Naalakkersuisunut siulittaasuusimasup Pituffimmut tunngatillugu suliariumannittussarsiuussineq politikkikkut soqutiginaateqartutut isiginiarsimanngikkaa. Suliaq 'allaffissornikkut suliassatut' isigisimallugu misissuinermut atatillugu nammineq oqaatigisimavaa.
Aleqa Hammondilli atorfilittaasa siunnersuutigisimavaat suliariumannittussarsiuussisoqarnissaa sioqqullugu Pituffiup Nunatsinnut pingaaruteqaqqusia pillugu allaatiginnittoqassasoq. Hammondilli allaatigisaq saqqummiunneqassanngitsoq kingorna aalajangersimavoq.
Aamma atuaruk Eqqartuussisuserisup misissuinera: Hammond nunanullu allanut tunngasunut pisortaqarfik takkuitsuuipput
Tamakkuli tamaasa Hammondip ullumikkut oqaaseqarfigerusunngilai. Tamanna aamma Naalakkersuisunut siulittaasuunermi nalaani akuuffigisimasaminut tamanut atuuttoq, allattaata oqaatigaa.
Nunanut allanut pisortaqarfimmi pisortaq Kai Holst Andersen, misissuineq naapertorlugu Pituffik pillugu suliami piginnaatitaanini unioqqutillugu iliuuseqarsimanerarneqartoq KNR-ip oqaaseqartinniarlugu maanna pissarsiariniarsaraa.
Aamma atuaruk ATAATSIMUT ISIGALUGU Pituffimmi kiffartuussinissamik isumaqatigiissutip annaaneqarnera
