PITUFFIK Nunatsinnit siunnersuutaasoq tusaanngitsuusaarsimagaat
Danskit kalaallillu ingerlatseqatigiiffiisa kisimik Pituffimmi kiffartuussinissamik isumaqatigiissummut neqerooruteqarsinnaanerannik qulakkeerisumik Nunatsinni atorfilittat siunnersuuteqarput, siunnersuutaalli danskit nunanut allanut ministereqarfiannit atorneqarsimanngilaq. Suliap ingerlanneqarneranik eqqartuussissuserisup misissuinerani allagaatinik KNR-ip takunnikkumalluni piumasaqaateqarnerata kingorna tamanna paasinarsivoq.
Pituffimmi kiffartuussinissamik isumaqatigiissutip aningaasarpassuarnik naleqartup amerikamiut suliffeqarfiutaannit Exelis Servicesimit pissarsiarineqarneranut tunuliaqutaasunik eqqartuussissuserisup misissuineranut tunngatillugu KNR-ip allagaatinik takunnikkumalluni 2015-imi juulip 14-iani qinnuteqaataa Naalakkersuisunit ippassaq akineqarpoq.
Pituffimmi kiffartuussinissamik isumaqatigiissutip suliariumannittussarsiuunneqarneranut malittarisassat allannguutaat pillugit Naalakkersuisunik ilisimatitsinnginnermigut Nunanut allanut pisortaqarfik Kai Holst Andersenimit siuttuuffigineqartoq piginnaatinneqarani iliuuseqarpoq inatsisitigullu kukkussuteqarluni.
Pituffimmi kiffartuussinissamik isumaqatigiissutip amerikamiut suliffeqarfiutaannit pissarsiarineqarneranut pisut tunuliaqutaasut eqqartuussissuserisumit misissuiffigineqarneranni taama inerniliisoqarpoq.
Suliariumannittussarsiuussinermut malittarisassanut nutaanut kalaallit kissaataasa danskit nunanut allanut ministereqarfiannit tusaanngitsuusaarneqarsimaneri nalunaarusiami aamma qulaajarneqarpoq.
Aamma atuaruk Kai Holst Andersen akisussaanerpaavoq
Exelis Servicesip isumaqatigiissummut neqeroorsinnaalerneranut pissutaasoq tassaavoq suliffeqarfinnut suliassamut neqeroorsinnaasunut piumasaqaataasut allanngortinneqarsimanerat.
EU-p unammilleqatigiinnermut inatsisiliorneranik unioqqutitsisoqarsinnaaneranik danskit nunanut allanut ministereqarfiata ernumassuteqarnera pissutigalugu malittarisassat allanngortinneqarput, piumasaqaatillu nutaat suliarineqarnerini pisut eqqartuussissuserisup misissuinerani sukumiisumik qulaajarneqarput.
Nunanut allanut pisortaqarfiup sivikitsuinnarmik suliaqareerluni suliariumannittussarsiuussinermut malittarisassanut nutaanut missingiummik danskit nunanut allanut ministereqarfiannut 2013-imi novembarip 15-iani nassiussisimanera misissuinermi ersersinneqarpoq.
Nunatsinnit missingiut nassiunneqartoq suleriaatsimut atorneqarsimasumut naapertuuppoq - tassalu ingerlatseqatigiiffiit Nunatsinneersut Danmarkimeersulluunniit kisimik Pituffimmi suliassamut neqerooruteqarsinnaatitaassasut.
Aamma atuaruk Eqqartuussisuserisup misissuinera: Hammond nunanullu allanut tunngasunut pisortaqarfik takkuitsuuipput
Ullulli pingasut qaangiutiinnartut danskit nunanut allanut ministereqarfiata suliariumannittussarsiuussinermut malittarissanut nutaanik siunnersuuteqarluni akissuteqarpoq, nalunaarusiamilu ima allassimavoq:
"Piumasaqaatit taakku allaanerungaatsiarput, nalunaarsorsimaneq piumasarineqartullu pingaarnerutikkunnaarneqarsimallutik".
Danskit nunanut allanut ministereqarfiata taamaalilluni piumasaqaatinut nutaanut Nunatsinnit siunnersuutigineqartumi oqaasertaliussat atunngilai, nammineerlunili siunnersuusiorsinnarluni amerikamiut aallartitaqarfiannut 2013-imi novembarip 25-ani nassiussilluni.
Ullut marluk qaangiummata amerikamiut siunnersuutertik nassiuppaat, nalunaarusiarlu naapertorlugu nalunaarsorsimaneq aammalu piumasarineqartut tassani pingaartinneqarput - taakkulu Exelis Servicesip kiffartuussinissamik isumaqatigiissummut neqerooruteqarsinnaalerneranut periarfissiipput.
Danskit/amerikamiullu piumasaqaatinut nutaanut siunnersuutaannut atatillugu Nunanut allanut pisortaqarfiup iliuuserisimasai pillugit nalunaarusiami ima inerniliisoqarpoq, "Piumasaqaatini allannguutit Namminersorlutik Oqartussat novembarip 15-iani siunnersuutaanut naleqqiullugit qanoq kinguneqartitsisinnaanersut Nunanut allanut pisortaqarfimmi atorfilittat akuusut takusinnaasimanngilaat".
Aamma atuaruk ATAATSIMUT ISIGALUGU Pituffimmi kiffartuussinissamik isumaqatigiissutip annaaneqarnera
