PITUFFIK Danskit nunanut allanut ministeriat oqaaseqarumanngilaq
Tamanna pivoq, Danmarkimi Nunanut allanut ministereqarfik Pituffimmi kiffartuussinissamik isumaqatigiissummut suliariumannittussarsiuussinermut malittarisassanik 2015-imi ajornerulersitsisimasoq misissuinermi ersersinneqaraluartoq.
Nunanut allanut ministerip tusagassiisartua naapertorlugu, Kristian Jensenip amerikamiut sakkutooqarfianni suliassamut suliariumannittussarsiuussineq sioqqullugu Namminersorlutik Oqartussat iluanni qanoq pisoqarsimaneranik misissuineq oqaaseqarfigerusunngilaa.
Aamma atuaruk Aleqa Hammond: Oqaaserfigerusunngilara
Nunanut allanut ministereqarfiup taarsiullugu innersuussutigaa danskit tungaannit oqaatigerusunneqartut Folketingimi ammasumik ataatsimiittoqarnerani oqaatigineqareersimasut.
KNR-ip danskit nunanut allanut ministeriannut apeqqutigerusukkaluarpaa Nunatsinni Nunanut allanut pisortaqarfiup Pituffimmi kiffartuussinissamik isumaqatigiissutip suliariumannittussarsiuunneqarnerani kissaatigisimasai ministereqarfiata sooq peersimanerai. Tamatuma kingunerisaanik isumaqatigiissut amerikamiut ingerlatseqatigiiffiannut Exelis Services A/S-imut tunniunneqarpoq - tamannalu Danmarkip, Nunatta USA-llu sakkutooqarfik pillugu isumaqatigiissutitoqaannut naapertuutinngilaq.
Aamma atuaruk Nunatsinnit siunnersuutaasoq tusaanngitsuusaarsimagaat
Suleqatigiissitani suliariumannittussarsiuussinermi malittarisassanik nutaanik suliaqartussani, Danmarkimit, Nunatsinnit USA-miillu peqataaffigineqartuni, 'nutaanik' saqqummertoqarpat aatsaat nunanut allanut ministeri Kristian Jensen oqaaseqarusuttoq, nunanut allanut ministereqarfimmit ilisimatitsissutigineqarpoq.
Pituffimmi kiffartuussinissamik isumaqatigiissut pillugu Danmarkimi nunanut allanut ministereqarfimmi suliap ingerlanneqarsimanera pillugu assingusumik misissuisoqarnissaa pilersaarutigineqanngitsoq aamma oqaatigineqarpoq.
Aamma atuaruk ATAATSIMUT ISIGALUGU Pituffimmi kiffartuussinissamik isumaqatigiissutip annaaneqarnera
