Pituffik pillugu suliaq illuatungiliuttunit iluarineqanngilaq
Pituffimmut suliaq Naalakkersuisut siuliisa ilisimasimappassuk taakku akisussaatinneqartariaqarput, Partii Naleraq sinnerlugu Inatsisartunut ilaasortaq, Per Posing Petersen oqarpoq.
Suliarli Naalakkersuisut danskit naalakkersuisuisalu akisussaaffigigaat, kukkunerillu amerliartuinnartut saqqummersalersullu pillugit taakkulu nassuiaasariaqalersut taamatullu ministeriuneq, Helle Thorning-Schmidt suliamut maanna akuleruttariaqalerluni, Inuit Ataqatigiit siulittaasuat, Sara Olsvig oqarpoq.
- Ajoraluartumik ministeriuneq, Helle Thorning-Schmidt Pituffimmut tunngasoq suliaq pillugu peqataarusungani oqarnikuuvoq. Taamaattumik maanna piumasariniarparput, ministeriunerup maanna nassuiaateqarnissaa, Naalakkersuisut danskillu naalakkersuisuisa suliamut tunngasumik qanoq ittumik suliaqarsimanertik pillugu.
Sara Olsvigip Inuit Ataqatigiinni Inatsisartunut ilaasortaq, Aaja Chemnitz Larsen aamma Folketingimi ilasortaq, Johan Lund Olsen peqatigalugit, tusagassiuutinut nalunaaruteqarnerminni allapput, suliaq Pituffimmut tunngasoq kanngunartutut taaqqajaalerneqalermat, Naalakkersuisut danskillu naalakkersuisui erseqqinnerusumik inuiaqatigiinnut maanna nassuiaasariaqalersut.
Naalakkersuisut siulittaasuat, maanna Paamiuniittoq oqarasuaatikkut attavigalugu suliamut tunngasumik KNR-imit oqaaseqartinniaraluarparput, taannali oqaaseqarusunngilaq nunanullu allanut tunngasunut Naalakkersuisoq, Vittus Qujaukitsoq innersuussutigalugu, taassuma Pituffimmut suliaq kisimi akisussaaffigigaa oqarluni. Vittus Qujaukitsorli maanna USA-mut timmisartorsuarmik ingerlaarmat oqaaseqartissinnaasimanngilarput.
Partii Naleraq sinnerlugu Inatsisartunut ilaasortaq, Per Rosing Petersen oqarpoq, Naalakkesrsuisuusimasut suliaq pillugu misissuisimanersut maanna qulaajarneqartariaqalersoq.
- Kalaallit Nunaanni pissutsit misissortariaqarpavut. Naalakkersuisuusimasunillu suliaq una ilisimaneqarsimanersoq paasiniartariaqarlutigu. Taamaattoqarsimappallu tamanna misissoqqissaarneqartariaqarpoq, tassami suliaq manna pillugu pissutsit akuersaarneqarsinnaanngilluinnarmata, Per Rosing Petersen oqarpoq.
Kikkulli Pituffimmi kissartuussissanersut aalajangernermi Nunatta danskillu Naalakkersuisui eqqumanngippallaarsimasut, Sara Olsvig isumaqarpoq.
- Maanna takusinnaasarput tassaavoq, suliffeqarfiit sorliit kiffartuussinissamut akuerineqarlutik allagartalersimaneqarnerat 2013-mi pisoq pillugu, danskit naalakkersuisui aamma Nunatsinni oqartussat tamanna eqqumaffiginngippallaarsimagaat. Allatut oqaatigalugu, taakku qisuariaataat naammassimanngilaq.
Inuit Ataqatigiit siulittaauat, Sara Olsvig oqarpoq. Taassuma taama oqarneranut Parti Naleraq isumaqataavoq.
- Suliap uuma ingerlanerani paasissutissat qallorneqartut misissoraanni takuneqarsinnaavoq naalakkersuinikkut, allaffissornikkut aamma politikkiut akisussaasunit suliaq kukkuluttornikkut ingerlanneqarsimasoq
Partii Naleraq sinnerlugu Inatsisartunut ilaasortaq, Per Rosing Petersen oqarpoq.
Inatsisartuni illuatungiliuttut tamarmik kissaatigaat, suliaq Inatsisartut Kukkunersiuinermut Ataatsimiititaliaanit misissoqqissaarneqalertariaqartoq.
