Pituffik pillugu suliaq Folketingimi oqallisigileraat
Isumasioqatigiinnissaq pingasunngornermi januaarip 21-ani 2015 pissaaq. Inuit Ataqatigiit tusagassiorfinnut nalunaaruteqarlutik taama allapput.
Danskit nunanut allanut ministeriata Martin Lidegaardip (R) Pituffimmi sakkutooqarfimmi kiffartuussinissamik amerikamiunut isumaqatigiissuteqartoqarsimanera pillugu decembarip tallimaani isumasiorneqareernerata kingorna tamanna pivoq. Ministerili isumasioqatigiinnermi akissutinik naammaginartunik saqqummiussaqarsimanngitsoq, Kalaallit Nunaannut tunngasunut Folketingip ataatsimiititaliaanit taamani oqaatigineqarpoq.
Taamaammat ataatsimiititaliap Johan Lund Olsenimit (IA) siulittaasuuffigineqartup Folketingimi ilaasortat tamaasa suliaq pillugu oqallinnissamut maanna aggersarpai.
- Suliap ilungersunartuunera annertussusaalu pissutigalugu suliarineqarnissaa aammalu Folketingip ataatsimiittarfiani paasisaqarfigilluarnissaa piaarnerpaamik pissasoq pingaaruteqarluinnarpoq, Johan Lund Olsen tusagassiorfinnut nalunaarummi taama allappoq.
Naammagittaalliuut februaarimi aalajangiiffigineqassaaq
Danskit kalaallillu suliffeqarfiisa, ilaatigut Greenland Contractors A/S-ip, sakkutooqarfimmi kiffartuussinissamut suliariumannittussarsiuussinermi neqerooruteqarsimasut naammagittaalliuutaat amerikami oqartussaasunit maannakkorpiaq suliarineqaleruttorput. Tamanna suliffeqarfiup amerikamiunit pigineqartup Exelis Services A/S-ip isumaqatigiissuteqarfigineqarneranik peqquteqarpoq, Danmarkip USA-llu akornanni illersornissaq pillugu isumaqatigiissummi allassimammat danskit kalaallillu suliffeqarfii kisiisa sakkutooqarfimmi aserfallatsaaliuinermik suliaqarnissaat piumasaqaataasoq.
Naammagittaalliuutit ullut 100-it nallertinnagit - imaluunniit 2015-imi februaarip 20-at nallertinnagu - suliaralugit naammassineqareertussaapput. Taamaammat aalajangiisoqannginnerani suliap Folketingimi suliarineqarnissaa IA-p kissaatigisimavaa.
Apeqquteqaat aallaavigalugu oqallinneq apeqqutaatillugu IA-p Danmarkimi illuatungiliuttut Socialdemokraatillu Pituffimmi sakkutooqarfimmut tunngatillugu isumaqatigiissusiortarnermut malittarisassat pillugit inatsisissatut siunnersuuteqarnissartik isumaliutigaat.
Kalaallit politikeriisa suliaq pillugu isumasioqatigiinnissamut aggersarneqarnissaannut Inatsisartut Nunanut allanut Sillimaniarnermullu ataatsimiititaliaanni amerlanerussuteqartut akuersaartinnissaat iluatsinneqarsinnaasimanngilaq.
