Pituffik pillugu Folketingimi oqallinneq knr.gl-ikkut malinnaavigiuk
Inuit Ataqatigiit folketingimi ilaasortaatitaata Johan Lund Olsenip nunanut allanut tunngasunut ministeri Martin Lidegaard, Pituffimmi sullissinissamut isumaqatigiissut pillugu tuaviortumik apeqquteqaateqarnissamut aqagu januaarip 21-ianni nalunaaqutaq ataatsimiit pingasunut Folketingip ataatsimiittarfiani pisussami qaaqqusimavaa.
Oqallititsinermut atasumik ataatsimiittarfimmi ataatsimoorullugu oqaaseqaatissamik siunnersuuteqartoqassaaq, Folketingimi ilaasortat taasissutigisinnaasaannik. Folketingip naalakkersuisut kajumissaassavai sakkutooqarfik Pituffik siunissami inuiaqatigiinnut kalaallinut iluanaarutaasussatut eqqanaassagaat, amerikamiummi atuinerminnut akiliineq ajormata.
- Assorsuaq nuannaarutigaara qallunaat naalakkersuisuisa kaammattoqatigiinnissaat Folketingimi amerlanerussuteqarluartunik tapersersorneqarmat. Uannut pingaaruteqarsimavoq Pituffimmi sullissinissamik isumaqatigiissut suli qallunaanit kalaallinillu tigummineqarnissaa, Kalaallit Nunaatalu amerikamiut Nunatsinniinnerat sapinngisamik annertunerpaamik iluanaarutigissagaa. Taamatuttaaq ilinniarfiit, suliffissat akileraarutitigullu isertitat eqqarsaatigalugit, Johan Lund Olsen oqarpoq.
Aammattaaq Inatsisartut nunanut allanut- sillimaniarnermullu ataatsimiititaliaani ilaasortat Sara Olsvig Inuit Ataqatigiinneersoq, kiisalu Steen Lynge Atassummeersoq Folketingip ataatsimiittarfiani tuaviortumik oqallitsitsinermi najuutissapput.