Pituffik pilllugu Inatsisartuni oqallinneq sivisooq isumaqatigiinnermik naggaserneqarpoq
Oqallineq akunnerit pingasut tikingajallugit sivisuseqarpoq.
Oqallittoqarnerani Naalakkersuisut nutaanik saqqummiussaqarsinnaanatik oqarput, kiffartuussinissamik isumaqatigiissut pillugu USA aamma Danmark isumaqatigiinniarnerat suli ingerlanneqarmat Nunanut allanut tunngasunut Naalakkersuisoq Vittus Qujaukitsoq oqarpoq.
Kiffartuussinissamik isumaqatigiissutit pillugit siunissami piumasaqaatit aalajangiinissamullu tunngaviusut qulakkeerneqarnissaat Naalakkersuisut suliniutigimmatigit, Vittus Qujaukitsoq oqarpoq.
Pituffimmi sakkutooqarfiup Kalaallit Nunaannit annerusumik iluaqutigineqarnissaa Naalakkersuisut aamma danskit naalakkersuisui suleqatigiillutik qulakkeerniaraat, Vittus Qujaukitsoq oqarpoq.
- Kalaallit Nunaata immikkut ittumik akuerineqarnissaanik kissaateqarnera danskit amerikamiullu naalakkersuisuinut erseqqissumik nalunaarutigineqartoq Naalakkersuisunut ilaasortap oqaatigaa.
Inatsisartut oqallinneranni illuatungiliuttunit paaserusunneqarpoq Pituffimmi kiffartuussinissamik isumaqatigiissutip allannguutaa 2013-imi danskit nunanut allanut tunngasunut ministereqarfiannit Kalaallit Nunaanni naalakkersuisunut ilaasortat ilisimatinneqarnerannut tunngasoq.
Oqallittoqarnerani Siumut sinnerlugu saqqummiussivoq siornatigut Aatsitassanut Naalakkersuisoq Jens-Erik Kirkegaard, taanna isumaqatigiissutip allannguuteqarnissaanut saqqummiussinerup nalaani naalakkersuisunut ilaasortaavoq.
Kiffartuussinermut isumaqatigiissuteqarnermi nunatta piumasaqaatai salliutinneqassasut partiit tamarmik isumaqatigissutigalugu oqaatigaat.
Pituffimmi sakkutooqarfimmi kiffartuussinermik isumaqatigiissutip annaaneqarneranut danskit nunanut allanut tunngasunut ministereqarfiat akisussaasuusoq, oqallinnermi Siumut sinnerlugu saqqummiussisoq oqarpoq.
Oqallittoqarnerani Inuit Ataqatigiit inatsisartuni ilaasortaatitaannit aperineqarpoq - kiffartuussinissamut isumaqatigiissutip allannguuteqarnissaanik danskit nunanut allanut ministereqarfiata saaffiginnissutaa ilisimasaqarfigineqarneraa.
- Malaannarlunga pisimasunik nassuiaateqarnissara kissaatiginngilara, kukkusumik nassuiaaniarsariguma paatsiveerussaaginnassaanga pisimasunut ilungersunareersunut, Jens Erik- Kirkegaard oqarpoq, eqqartuussissuserisullu qulaajaanerisa naammassineqarnissaat utaqqineqassasoq taanna oqarpoq.
Sakkutooqarfimmi Pituffimmi kiffartuussinissamik isumaqatigiissutit siunissami Kalaallit Nunaannit piumasarineqartut erseqqissaatigineqartarnissaat inatsisartuni partiit tamarmiusut piumasaraat.
Sakkutooqarfik Pituffik pillugu apeqquteqaat aallaavigalugu oqallinneq Inatsisartut oqaaseqaatissatut siunnersuuteqarnerannik naggaserneqarpoq.
Partiit tamarmiusut isumaqatigiillutik oqaatigaat Pituffimmi kiffartuussinissamut isumaqatigiissutip annaaneqarsimanera inatsisartut ataatsimoorlutik ilungersuumminartutut isigalugu nalunaaruteqarput, partiit tamarmisut atsiugaannik.
