- Anoraa tamatumuuna sakkortoqaaq, Kommuneqarfik Sermersuumi Tasiilami immikkoortortaqarfimmi pisortaq Hjørdis Viberg oqarpoq.

Taassuma oqarnera naapertorlugu anoraa nillertitsinera ilanngullugu 34-nik issippoq.

Piterarnissaanut pingasunngornermi aarlerisaarisoqarmat Kommuni aalajangerpoq atuarfiit, paaqqinnittarfiit kommunimilu allaffii matoqqatinniarlugit. Silasiut malillugu aarlerisaarineq aallaavigalugu januaarip arfineq aappanniit qulaaluaa ilanngullugu matoqqatitsinissaq aalajangiuteqqaarneqaraluarpoq.

Anorili pingasunngornermi sakkukilleriarmat ulloqeqqa qaangersimatsiaraa kommuni facebook aqqutigalugu nutaamik nalunaarusiorpoq:

Sila erseqqarissiartulernera unerisimanerulerneralu peqqutigalugu atuarfiit, paaqqinnittarfiit kommunillu allaffii januaarip qulingiluaanni ammatinneqaannassasut nalunaarutigineqarpoq.

Piterarli allatut takkunniarsimavoq. Pungasunngornermi ualikkut unnukkullu anoraa sakkortusiartoqqilerpoq, anorlilerluni 30-nillu issilluni. Anoraalu aatsaat sisamanngornermi ualikkut sakkukilliartulerpoq, Tasiilamilu innuttaasut aputaajaasinnaanngorput.

- Piteqqap takkutinngitsiarnerani miiterip affaannik apivugut, piteqqallu sumut tamaat illoqarfimmut siaruaappa maagaliornartunngortillugu. Taamaammat inuit aputaajaallutik ulapputeqaat maani, Hjørdis Viberg oqarpoq, anorersuarneranili inunnik ajoqusertoqarsimanngitsoq aamma oqaatigaa.

Kommuneqarfik Sermersuup nittartagaani aamma atuarneqarsinnaavoq anorersuaq Ittoqqortoormiunut anngussimammat, atuarfiit, paaqqinnittarfiit kommunillu allaffeqarfii ullumi matoqqatinneqarput.