Aalerinartunik naliliineq nutaaq USA-p nunarsuarmi qeqertat annersaannut soqutiginnilerneranit ukioq ataaseq qaangiuttoq saqqummersinneqarpoq, matumani ilaatigut Donald Trump nunatsinnik piserusunnerarpoq USA-lu Nuummi konsulateqarfimmik ammaanialerluni.Assi: KNR / Anton Gundersen Lihn

Pissaanilissuit nunatsinni pissaaneqarniuunnerat aarlerinarnerpaalersoq

Issittoq nalunaarusiami nutaami sumiiffinni aarlerinartuni allattorsimaffimmi qaffasinnerpaaniippoq. Aaqqiagiinngittoqartitsinissaq ajornakusoortoq illernissamut ministeri isumaqarpoq.

Illersornissaqarfiup isertortumik misissueqqissaartartuisa (FE) ukiumoortumik aarlerinartunik naliliinerat tallimanngormat saqqummerpoq, nunarpullu isertortumik paasiniaasartut ullormut oqaluuserisassaanni qullerpaami nutaatut inissisimalerpoq.

Aalerinartunik naliliineq nutaaq USA-p nunarsuarmi qeqertat annersaannut soqutiginnilerneranit ukioq ataaseq qaangiuttoq saqqummersinneqarpoq, matumani ilaatigut Donald Trump nunatsinnik piserusunnerarpoq USA-lu Nuummi konsulateqarfimmik ammaanialerluni.

Taamaammat Issittup ukkatarineqartartut allat nalinginnaasut soorlu peqqarniisaarniartoqarnissaanik qarasaasiatigullu pinerluuteqarniartartunik ukkatarinninnerit ukioq manna qaangerpai.

Aarlerinartoqartinnginniarnera ajornakusoortoq

- Issittoq ukiuni kingullerni sammineqarnerulerpoq. Tamannalu naleqquppoq minnerunngitsumik USA-p sumiiffimmut atatillugu pissusilersuutaata allanngorneratigut, Lars Findsen oqarpoq.

Aarlerinartunik naliliinermi nutaami, Ritzauip takusaqarfigilaagaani isertortumik paasiniaasartut Issittumi aarlerinartukitsitsiniarnerminni naligiissaariniarneq ajornakusooriartulissasoq nalilerpaat.

AAMMA ATUARUK Periarfissat, pissaaneqarniuunneq, aningaasallu: USA-p nunatsinnut soqutiginninnera annertusiartortoq

Illersornissamut ministeri, Trine Bramsen (S) aamma taama isumaqarpoq:

- Issittup aarlerinanngitsuutinnissaata attannissaa danskit naalakkersuisuisa suli politikkeraat. Kisianni tamanna unammillernartoq tamanut ersarissoq isumaqarpunga, Bramsen oqarpoq.

Pissaanilissuit akornanni kiggigussaaqqasoq

Danmarkip nunattalu pissaanilissuit akornanni ajornarsiartorpoq.

Ruslandip sakkutooqarnikkut Pituffimmut eqquinissaa Kinallu kalaallit pisuussutaannik attaveqatigiinnerannullu aningaasaliinikkut nakkutiginnilerusunnera USA-p ernumassutigaa.

AAMMA ATUARUK Immikkut ilisimasalik: USA qimagunnavianngilaq – periarfissat allat ajornerupput

Illersornissamut Ilinniarfimmit, Jon Rahbek-Clemmensenip Issittumi sillimaniarnermut politikki ilisimatusarfigaa.

Taassuma isertortumik paasiniaasartut Issittup ullormut oqaluuserisassani qaffasinnerpaamiilernera ”soqutiginarluinnartuunerarpaa”.

Ukkatarinninnermi amerikamiut malinnaaffigineqartut

- Oqaluttuarisaanermut qimerlooraanni Issittoq pingaaruteqannginnerpaamiit isertortumik paasiniaasartut susassaqarfiini pingaarnerpaalerpoq, Jon Rahbek-Clemmensen oqarpoq.

Jon Rahbek-Clemmensenip isertortumik paasiniaasartut 2009-p siornatigut aarlerinartunik naliliineranit Issittoq ilaasimanngitsoq unnersuussutigaa.

AAMMA ATUARUK Russit sakkussiornerat, aatsitassat aamma Issittumi umiarsualiviit nutaat, USA-p soqutiginninneranut tunngaviupput

- Sukkasoorujussuarmik pingaarneruleriartorpoq, tamanna USA-p isiginninneratigut soorunami ersersinneqarpoq.

- Danmarkip nunanut allanut tunngasunut sillimaniarnermullu politikkiata ilarujussua amerikamiut isiginiagaanniinnissamut tunngavoq, Jon Rahbek-Clemmesen oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat