Avannaata Kommuniata allattoqarfia sulisoqarnerulilertoq
Atorfiit arfineq-pingasut pilersinneqartussat, atorfiit allat tallimat atorunnaarsinneqassapput.
Tassa Avannaata Kommuniata qitiusumik allattoqarfimminut, kommuni naapertorlugu innuttaasunik politikerinillu pisariinnerusumik pitsaanerusumillu sullissinermik kingunertussamut, pilersaarutaa.
Avannaata Kommunia ullumikkut atorfinnik 97-nik kiisalu ullup affaanut atorfimmik allattoqarfimmini pigisaqarpoq, taakkualu 101-nngortinniarneqarput ullup affaanut atorfik ilaliullugu.
AAMMA ATUARUK Avannaata pisortanik atorfitsitsinermi malitassanik sukateriniartoq
Taamaaliornissarlu, akileraartartut akiligaannik, 3 millioner koruuninik aningaasarsiaqartitsinerulernissamik kinguneqassaaq.
Pisortatut atorfiit marluk atorunnaarsinneqartut
Atorfinni nutaani pilersinneqartussani sulilersussat amerlanerit kommunip teknikkeqarnermut ingerlatsiviani sulissapput, tassani atorfiit nutaat sisamat pilersinniarneqarput.
Tamatuma saniatigut kommuni aningaasaqarnermut pisortatut atorfimmik oktobarip aallartilaarnerani pilersitsivoq, allattoqarfimmi pisortatut atorfimmik aamma perorsaanermut siunnersortitut atorfimmik kommuni aamma pilersitsisussanngorpoq.
Avannaata Kommuniani tusagassiisartutut pisortaq, Káte Hansen, KNR-imut ilisimatitsivoq kommunalbestyrelsi marlunngornermi ataatsimiikkami aalajangersimasoq pisortatut atorfiit marluk atorunnaarsinneqassasut. Pisortatut atorfiit pineqartut marluk tassaapput ataatsimoorussanik sullissinermut ingerlatsivimmi pisortatut atorfik aamma inuussutissarsiornermut pisortatut atorfik.
AAMMA ATUARUK Qaammatit sisamat qaangiuttut: Avannaata Kommuniani pisortaaneq soraartoq
Kommunalbestyrelsip novembarip 26-ani ataatsimiinneranit imaqarnialiaq avammut suli saqqummiunneqanngimmat nalunarallarpoq aningaasarsianut 3 millioner koruuninik aningaasartuuteqarnerulernissaq 2020-mut missingersuutinut ilanngunneqarsimanersoq.
Missingersuutigineqartussatut isumaqatigiissutigineqarsimasut naapertorlugit kommuni 2020-mi 4,1 millioner koruuninik sinneqartooruteqassasoq naatsorsuutigineqarpoq, sinneqartooruteqartarnissarlu ukiuni tulliuttuni annertunerulaartassasoq aamma naatsorsuutigineqarpoq.
