Avannaata pisortanik atorfitsitsinermi malitassanik sukateriniartoq
Tamanna kommunalbestyrelsip marlunngornermi ataatsimiinnerani oqaluuserisassat ilaanni takuneqarsinnaavoq.
Naammaginninnginneq aallaaveqarpoq maanna pisortaanertut soraarsimalersup, Søren Stach Nielsenip, aningaasaqarnermut pisortamik atorfinitsitsisimaneranut. Oqaluuserineqartussatummi saqqummiunneqartut naapertorlugit aningaasaqarnermut ataatsimiititaliap aningaasaqarnermut pisortamik atorfinitsitsineq kingornatigut akuerisimavaa, kisianni piumasaqaatigalugu atorfinitsitsineq kommunit nakkutilliisoqarfiannit misissorneqassasoq.
AAMMA ATUARUK Qaammatit sisamat qaangiuttut: Avannaata Kommuniani pisortaaneq soraartoq
Kommunit nakkutilliisoqarfianni kommunit inatsisit atuuttut malillugit ingerlatsinersut nakkutigineqartarput.
- Suliassanik ingerlatsivinnut pisortamik atorfinitsisoqartarneranut kommunip aalajangersakkat malittarisimanerai misissugarineqartussaavoq, kommunalbestyrelsip ataatsimiinnissaanut saqqummiussami taama allaaserinnittoqarpoq.
Tassa inatsisit atuuttut kommunimit malinneqarsimanersut misissorneqartussaasimavoq - malinneqarsimasullu kingorna paasinarsivoq.
Aningaasaqarnermulli pisortamik atorfinitsinermi kommuunip aqunneqarneranut ileqqoreqqusaq malinneqarsimasoq kommunit nakkutilliisoqarfiannit inerniliunneqarsimavoq.
Nakkutilliisoqarfiulli pisortanik atorfinitsisarnerni malittarisassaqarnissap pingaaruteqartuunera tikkuarsimavaa.
Taamaattumik kommunalbestyrelsimut innersuussutigineqarpoq kommuuni pisortanik siunissami atorfinitsisarnermini aningaasaqarnermut ataatsimiititaliamik akuutitsisarnissaa.
