Pisortaq tunuaraangat ilisimasat annaaneqartartut
Kai Holst Andersen ilinniagartuujuvoq, Nunanullu Allanut tunngasunut naalakkersuisoqarfimmi ukiuni sisamani pisortaareerluni maajip aallaqqaataani atorfimminiit ingerlaannaq atuutilersumik tunuarpoq.
Pisortat taamaattut tunuaraangata ilisimasanik annaasaqaataasartoq, Namminersornerullutik Oqartussani Namminersorlutillu Oqartussani ukiorpassuarni pisortaasimasoq oqarpoq.
- Ilisimasat ilaatigut annertuujusinnaasut annaaneqartarput, pingaartumik pisortaq suliffimmini ippigineqarnani, tassami ajorineqarnani piffissami sivisunerusumi sulisimagaangat. Taamaalilluni ilisimasassat assigiinngitsut annaaneqartarput, imaluunniit maanngaannartarput, Jakob Janussen oqarpoq.
Ilisimasaannaannaanngillalli. Pisortaasimasup suleriaasia attaveqarfiilu aamma pingaarutillit annaaneqartarput. Nutaatullu aallartikkaanni aallaqqaataaniit attavissanik ujarlernissamut piffissangaatsiaq atorneqarsinnaasarpoq.
- Soorunami taanna pingaartorujussuuvoq politikeritut imaluunniit atorfilittut qutsinnerusutut inissisimasutut ilaatigut nukinginnartumik aalajangiisariaqalertillugu tunngavissamik ujarleqqaarnissaq ilaatigut killeqartarpoq.
Suliallu ingerlareersut, assersuutigalugu Kai Holst Andersenip suliat ingerlatarisimasai kinguaattoorsinnaapput, pisortaasimasoq Jakob Janussen oqarpoq
- Soorunami nutaat iserfiginialissagunikkit taanna kinguarsaataasutut isigineqarsinnaavoq.
Pisortaq nutaaq ilinniartinneqaqqaartarpoq
Nutaamik pisortartaarnermi aallaqqaataanik ilinniartitsinerit piffissangaatsiamik atuisinnaasarput, ammasuugaannili pisariinnerusinnaasoq, Jakob Janussenip oqaatigaa.
- Suliffiginialigassaminni pissutsit qanorpiaq ittuunersut ammasumik iserfigisinnaagunikkit taavalu isummersorfigisinnaallugit taava aallarteriarnissaat pisariinnerusinnaasarpoq, nammineq isummiuteriikkatik aallaaviginagit.
Ilisimasat toqqorneqarnissaa pisariaqarpoq
Minnerunngitsumillu, pisortap tunuartut ilisimasarpassui atoqqitassatut toqqorneqarsinnaanissaat kaammattuutigaa.
- Pingaartorujussuuvoq ilisimasat taamaattut maangaannarnatik toqqorneqarnissaat aamma siunissami iluaqutigineqarsinnaasarmata, Janussen naggasiivoq.