Pisortaq: Atuisuunerup akisuneruleqqinnginnissaa neriorsuutigisinnaanngilara

Nukissiorfiit aningaasarliortuarsinnarpoq. Namminersorlutik Oqartussat suliffeqarfiutaat 2024-mi 60 millionit koruuninik amigartoorpoq.

Tassalu pissutsit ukiut siuliinit allaanerungaanngillat. Ukiunimi naatsorsuusiorfiusuni kingullerni tallimani ukiumut agguaqatigiissillugu 82 millionit koruuningajannik amigartoortarpoq.

Suliffeqarfiup aningaasaqarnera oqimaaqatigiinnerulissappat atuisut akiliutaat ukiortaami pereersutuut qaffaqqinneqarnissaat aqqutissat ilaattut pisortap nalilerpaa.

- Ukioq manna januaarip aallaqqaataani 2025-imi kallerup inneranut taavalu imeqarnermut akit aamma qaffannikuullutik. Taakkua aqqutissaapput, aamma aqqutaapput, Nukissiorfiit aningaasaqarnerata nalimmassarneranut aqqutit ingerlaartut, Johan Danielsen KNR-mut oqarpoq.

Ukiortaamit akitsuineq ilaatigut tassaavoq kallerup innerata kilowattimut akia. Siorna ukiup naanerani 1,81 ooreqarpoq tamassuma kingorna 6 oorimik akisunerulerpoq. Akitsuineq aningaasaqarnerup pitsaanerulerluni oqimaaqatigiinnerulernissaanut aqqutissatut nalilerneqarpoq.

- Taanna soorunami Nukissiorfiit aningaasaqarneranut iluaqutaasussaavoq, pisortaq oqarpoq.

Taamaattumik Nukissiorfinnut atuisut kiassarnermut, imermut kallerullu inneranut akiliutigisartagaasa qaffaqqinnginnissaat pisortap neriorsuutigisinnaanngilaa.

- Taanna neriorsuutigineqarsinnaanngilaq. Kisianni akit allanngoriartornerat ilutigalugu aamma takusariaqarparput sumununa ingerlasoq, aserfallatsaaliinermut aammalu nutarsaanermut aningaasartuutigisaat Nukissiorfiit, Johan Danielsen oqarpoq.

Aserfallaqqaqisut

Nukissiorfiit pigisamik aserfallatsaalinissaannut 1,8 milliardit koruuninik 2022-mi amigaateqarput. Taakkununngalu aningaasaliinissat aningaasaqarnerup oqimaaqatigiilernissaanut tulluarsartariaqartut pisortaq oqarpoq.

Aningaasaatit amerlanerulersimanngitsillugit aserfallassimasunut aningaasaliivallaarneq suliffeqarfiup ukiup naanerani aningaasaateqassusianut pitsaassanngilaq.

Aserfallassimasulli iluarsaannissaannut aningaasaliinikippallaaraanni aamma pitsaassanngilaq, pigisat aserfallakkaluttuinnarnerannik kinguneqassammat.

- Oqimaaqatigiilernissaanut aamma aningaasartuutit pinngitsooratik isigineqartussaasariaqarput. Ukua isertitassanit akit kisiisa eqqarsaatiginagit, Johan Danielsen oqarpoq.