Nukissiorfiit millioninik marlunnik kisitsisitalinnik amigartooqqipput

Namminersorlutik Oqartussat suliffeqarfiutaat, Nukissiorfiit, aningaasatigut ilungersunartorsiortuarsinnarpoq.

Suliffeqarfissuaq nukissiornermik suliaqartoq 2024-imi 60,2 millionit koruuninik amigartoorpoq.

Inuutissarsiornermut, Nukissiutinut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfik, tusagassiorfinnut taama ilisimatitsivoq.

- Nukissiorfiit aningaasaqarnerat oqimaaqatigiinngitsoq ajornartorsiutaavoq ilisimalluarneqartoq. Nukissiorfiit isertitai aningaasartuutaalu imminnut ataqatigiinngitsut, ukiorpassuarni paasisariaqartarsimavarput, nukissiuuteqarnermut naalakkersuisoq, Naaja H. Nathanielsen, tusagassiorfinnut nalunaarumminni allappoq.

Amigartoortuartoq

Nukissiorfiit ukiuni naatsorsuusiorfiusuni kingullerni tallimani ukiumut agguaqatigiissillugu 82 millionit koruuningajalluinnarnik amigartoortartoq, ukiumoortumik naatsorsuutaani atuarneqarsinnaavoq.

Naalakkersuisulli tusagassiorfinnut nalunaarutaat naapertorlugu isertitat aningaasartuutillu oqimaaqatigiilersinneqarnissaat pillugu pilersaarusiortoqarsimavoq.

- Nukissiorfiit ilungersuuteqarnerit taakkua pillugit suleqatiginissaa, Nukissiuutinut suliassaqarfimmut Naalakkersuisutut akisussaasutut uannut pingaaruteqarpoq. Nukissiorfiit atugassarititaasut ajornakusoortut tunngavigalugit sullissinermik inuiaqatigiinni pinngitsoorneqarsinnaanngitsumik pilersuisuuvoq. Tamanna innaallagiamik, imermik kiassarnermillu aalajaatsumik pilersorneqarnissaq pisariaqartipparput, Naalakkersuisoq, Naaja H. Nathanielsen, allappoq.

Nukissiorfiit 2023-imi 86,2 millionininik aamma amigartoorpoq.

Nukissiorfiilli amigartorneriinnarmik ajornartorsiunngillat. Pigisaasami iluarsartuunnissaannut aningaasat 1,8 milliardit koruunit 2022-imi amigaataasut, suliffeqarfiup siusinnerusukkut nalunaarutiginikuuaa.