Pisortaasimasoq kannguttaatsuliornerarneqartoq: Eqqartuussineq pingasunngornermi aallartinneqassasoq
Sisimiuni Eqqartuussisoqarfik Qeqqani suliaq oqallisaangaatsiartoq pillugu eqqartuussineq pingasunngornemri ualikkut nalunaaqutaq aqqanermut aallartinneqassaaq.
Eqqartuussivimmi suliaq KNI-p pisortarisimasaanut Peter Grønvold Samuelsenimut tunngassuteqarpoq.
Taanna suliffeqarfimmi atorfeqarnermi nalaani arnanut katillugit tallimanut kannguttaatsuliorsimasutut pasineqarpoq.
Unnerluutigineqartup qaammatini pingasuni pineqaatissinneqarsimasunut inissiisarfimmiitsinneqarnissaa piumasaraat, Sermitsiaq.AG-li naapertorlugu Peter Grønvold Samuelsen pinngitsuunerarluni pinngitsuutinneqarnissani anguniarpaa.
KNI (Kalaallit Niuerfiat)
KNI namminersorlutik oqartussat ingerlatseqatigiiffiutigaa, tassannga nioqqutissanik, ikummatissanillu pilersuisoqartarpoq.
Ingerlatseqatigiiffik sisamanik ingerlatsiveqarpoq, tassa Polaroil, Pilersuisoq, KNI Engros piginneqatigiiffillu allamit aqunneqartoq Neqi A/S.
KNI-p qullersaqarfia Sisimiuniippoq.
Unnerluussissut KNR-ip takunnissinnaaffigisaa naapertorlugu kannguttaatsuliornerit nassuiaatigineqartut KNI-p allaffiani aamma suliffimmut atatillugu angalanermi 2016-ip 2021-llu akornanni pisimapput.
Arnat tallimat atorfeqarnermi nalaani maanna pisortaanerusimasumit kissaatiginngisaminnit attuuaneqartarsimallutik oqaatigaat.
Matumani pukusukkut, tuillut, siffiakkut, qitikkut, unikkut nulukkullu attorneqarnerit ilaatigut pineqarput.
Kissaatiginngisamik eqitsinnik kunitsinnerlu
Arnat arlallit eqitsillutillu uluakkut imaluunniit pukusukkut kunitsittarsimallutik kiisalu iviangequtimi ujatsiutitaatitaat tigusarai oqaatigaat.
KNI A/S-imi kanngunartuliat
- KNI-p aningaasaqarneranut atatillugu kukkunerit qoqassiiniarnerillu, siorna novembarimi nalunnginnittut tusagasiuutinut oqaluttuarnerisa kingorna saqqummeralerput.
- Qaammatini arlalinni misissuisoqareersorlu, aningaasaqarnikkut qoqassiiniartoqarsimasoq siulersuisut nassuerutigaat. Manna tikillugu akileraannginnermi tamanna ingerlatsivimmut 112 miliuuni koruuninik akeqarsimavoq 12,5 miliuuni koruuninillu amigartoortitsilluni.
- Pisimasulli suli akisunaarutaasinnaanersut ingerlatsivimmi pisortat suli ilisimanngilaat.
- Uppernarsaatinik salloqittaasiorsimasutut pinerlunniarsimasutullu inuk ataaseq politiinut unnerluutigineqarpoq, taannali kinaanersoq aningaasallu qassit pineqarnersut, KNI-mit oqaatigineqarumanngillat.
- Tamatuma saniatigut kinguaassiuutitigut kanngutsaatsuliorsimasutut unnerluussaalluni pisortaq Peter Grønvold Samuelsen soraarsitaavoq. Taanna tassunga atatillugu politiinut unnerluunneqarpoq.
- Unnerluussinerit saqqummertalermata pisortaasimasoq Peter Grønvold Samuelsen soraarsinneqarpoq. Taassumunnga paarlattaavoq Jeppe Jensen. Tamatuma saniatigut sulisunik sullissivimmi pisortaasimasoq siulersuisunullu siulittaasuusimasoq Lars Borris Pedersen tunuarpoq, taannalu Svend Hardenberg-ip paarlappaa.
Arnap ataatsip iviangini pisortaasimasup assaminik attorniassagamigit, tunuminut periarluni assani uniata nalaasigoortissimagai nassuiaatigaa.
AAMMA ATUARUK KNI-mi sulisuusimasoq: Tununninngaanniit ivianngikkut attuuavaanga
Pisumi allami arnaq tigoriarlugu atoqatigiinnermi ”trillebør”-ertuusaarneq oqaatigisimavaa.
Arnat arlallit Peter Grønvold Samuelsen atoqatigiittarnerminnut tunngasumik apersuisarsimanerarpaat.
Arnat ilaata ”qanorli siniffimmut qilersorlutit” aamma ” ilaani naalanngituulaartarama” pisortaasimasup oqaatigisimagai oqaatigaa.
Upernaaq soraartoq
KNI-mi pisortaasimasoq kannguttaatsuliorsimasutut politiinut unnerluutigineqartoq marsimi saqqummiunneqarpoq.
Taanna tassunga atatillugu oqarpoq:
- Ajuusaarlungalu utoqqatserpunga kimulluunniit killissaanik qaangiillunga innimiilliorfiginnissimassaguma pissusilersornikkut oqaatigisimasakkulluunniit.
AAMMA ATUARUK KNI-mi pisortaq: Killissamik qaangiisimaguma utoqqatserujussuarpunga
Peter Grønvold Samuelsen tamanna sioqqutitsiarlugu atorfimminit soraarpoq.
Taassuma soraarneranut suna pissutaanersoq piffissami tassani saqqummiunneqanngilaq.
Peter Grønvold Samuelsenili suliffeqarfiup iluani innimiilliortoqartarneranik misissuisoqarnerata kingunerisaanik soraaqquneqaqqaariarluni KNI-mit soraarsinneqarsimasoq KNI-p siulersuisuisa nutaat oktobarimi paasissutissiissutigaat.
Peter Grønvold Samuelsen KNI-mi ukiuni arfineq-marlunni pisortaaneruvoq.
Pingasunngornermi sisamanngornermilu eqqartuussisoqassaaq.
