Ujararujussuit aqqusinermut nakkaanerat: Pisoq politiit suliffinnillu nakkutilliisoqarfiup ilisimavaat

Takorlooruk 30 kilometerersorlutit biilerusaaruttorlutit ujararujussuarmik biilip saatunginnguanut tassanngaannaq assakaasoqarnera. Taamaattut ajutoortitsissutaarujussuarsinnaapput. Siaqqinnermimi, Nuummi mittarfiup tungaanut aqqummi taama misigisaqariataarsinnaavutit. Qularnanngitsumik.

KNR-ip innuttaasut arlallit attavigai, qamussuit ujararujussuarnik usisut sivinganersuakkut – biilertunut ulorianaqisumik – nakkaatitsisunik naammattuuisimasut. Soorlu ippassaq unnukkut taama pisoqartoq. 

Sanioqquttummi nal. 20.30 missaani una immiuppaa.

Ippassaaninnguaq aqquserngup qeqqanut aamma tammittoqarmat innuttaasoq assiliivoq.

Assimi takuneqarsinnaapput, sulisartut akisuttartulinnik sullisillit ujarassuaq kaajallallugu tikinneqartussaajunnaarlugu nappaqqusersuisut. Ujarassuaq kingornatigut peerneqarpoq. Taamali pisoqaraluartoq suli sivinganikkut ujarassuarnik nakkaatitsisoqartoq videomi takuneqarsinnaavoq – uffalu sulisut aqqusinermut tuttoqarsinnaanera paasereeraat.

Ajornartorsiullu taanna Kalaallit Nunaanni Politit ilisimavaat. 

Politiit ujarassuarnik aqqusinermut tuttoqarsimaneranik marloriarlutik nalunaarfigitipput. 

Aarleqqut nangippoq

Nalunaarut siulleq sisamanngorneq aggustip 24-at nal. 13.25 pivoq.

Nalunaarut tulleq marlunngorneq aggustip 29-at nal. 19.28 pivoq.

Kalallit Nunaanni Politiit ilisimatitsissutigaat ulloq siullerli nammineq pisoq Sullivinnik Nakkutilliisoqarfimmut kalerriutigisimagitsik. Sapaatip-akunneri marluk matuma siornagut. Taamaakkaluartoq biilertut allallu aqqusinikkoortut, ujarassuarnit eqqugaanissaminnut suli aarlerinartorsiortut, KNR-ip erseqqissumik paasivaa.

KNR-ip suliffeqarfik Munck, mittarfiliornermik isumaginnittuusoq, attaviginiaraluarpaa, maannamut iluatsinngitsumik.

Kalaallit Airports Facebookikkut nalunaarpoq, ajornartorsiut eqqumaffigigitsik. 

- Nuummi sanaartornermik suliaqarnermi maskiinat oqimaatsut mittarfiup isuani avannarlermi ujaqqanik innaarsuup sinaatigut kaamisarneqartut, taamaalillutik angallannermi saneqquttut qanitaannut assakaallutik unittartut, videoliarineqarsimanerat, allarpassuartuulli inuit attaveqatigiittarfiini takuagut.

- Kalaallit Airportsip pisoq ilungersunartorujussuartut isigaat, aammalu isumannaallisaaneq sanaartornermik suliaqarnermut annertuumut tunngatillugu ingerlanneqartuaannartussaq naliliiffigineqassaaq. Tamanna ajuusaarnartorujussuuvoq aammalu taamaattoqarsinnaasariaqanngikkaluarluni. Maannakkut Entreprenørip, suliaqarnerminnut atatillugu isumannaallisaanermi iliuusissanik pilersitsinermut atuutsitsinissamullu akisussaasuusup, tungaanut tamanna malitseqartinneqassaaq, aammalu ingerlaannaq pisariaqartunik iliuuseqartoqarnissaa qulakkiissavarput, taamaalilluni suliaqarneq isumannaatsumik, saneqquttunut isumannanngitsumik, ingerlanneqassalluni.

Innuttaasut qangali uffa nalunaaruteqareersut sooq aatsaat iliuuseqartoqarnialernernera paasiuminaassinnaavoq.

KNR-imiit Sullivinnik Nakkutilliisoqarfimmi sulisumik apersuiniaratta aamma iluatsitsinngilagut.