Pisasseeriaatsit isumasioqatigiissutiginiarneqartut

Qaasuitsup Kommuniani  kommunalbestyrelsip isumaqasioqatigiinnissamut siunnersuummik aningaasatuutigineqartussat ilanngullugit allaffissornikkut siunnersuusiortoqarnissaa suliakkiissutigivaa.

Isumasioqatigiinnissamullu siunnersuuteqartup kommunalbestyrelsip aalajangernera tigulluarpaa:

- Tassa aalisarnermut inatsisip pilersinneqarnerata kingorna eqqorneqaatit annertuut ilagivaat soorlu umiatsiaararsortut ilaatigut qaammatit tallimat angullugit aalisarsinnaanerat ajornaasavissisimavoq. Aammalu angallatit 6 meterimiit takinerusut arlalippassuanngoreersut aalisarnerminnik massakkut unitsitsisariaqarsimapput pisassiissutigineqartut imminerminnut akilersinnaasimanngimmata, Karl Kristian Kruse oqarpoq.

Taassuma qaleralinniarnermi pisasseeriaatsit 2012-mi atulersinneqartut atuisunit eqqartorneqaqqinnissaat kissaatigaa:

- Tassa susassaqartut paaseqatigiillutik ukiuni tullerni aalisarnikkut atugassamikkut ilusilersueqatigiinnissaat angorusuppara. Massakkut qulaaninngaanniit aaqqissuussineq kisiat aallaavigalugu takusinnaangakku qanoq eqqorneqarnerput annertutigisoq maani qaleraleqarfiusumi,Karl Kristian Kruse oqarpoq, nangillunilu:

- Taamaattumik aalisartut nungutinneqassanngippata ataatsimoortumik susassaqartut oqariartoqatigiinnissaat siunnersuutigisimavara isumasioqatigiinnikkut naalakkersuinermik suliaqartunut oqariartuutigineqassammat, Karl Kristian Kruse oqarpoq.

Umiatsiaararsorlutik qaleralinnianut 6 meterinillu takinerusunik angallataatilinnut pisassat immikkoortillugit ukiormanna agguaanneqartalermata, umiatsiaararsorlutik aalisartut Qeqertarsuup Tunuani pisassaminnik juuli naanginnartoq ilaatigut nunguutsipput.