Pinngitsaaliissummik matoqqaanissaq tusarniaanermi akissuteqarfigineqanngilaq
Nassuiaat aasaq juunimi tusarniaassutigineqaraluarpoq, naalakkersuisulli siulittaasuata naalakkersuisoqarfianiit naatsumik akissuteqarnermi nassuiaammi inassutigineqartunut oqaaseqartoqanngilaq, soorluttaaq nunaqarfiit napaannarumaanngitsutut taaneqartut aamma eqqaanngikkaat.
Tusarniaanermilu akissuteqartut nassuiaat arlaannaataluunniit politikerisulli atuarsimanngilaa. Nunaqarfinnimmi pingitsaaliissummik matooqqaanissatut politikerit atuarpaat.
Nunaqarfinnut siuariartorfiulluarsinnaasunut pilersaarummik inassuteqarpoq
Nuna tamakkerlugu pilersaarummut nassuiaammi tikkuakkat pingaarnerit ilagaat aningaasaliissutit najugaqarfinnut tamanut siaruaraanni ikittuararsuakkaanngussasut. Taamaammat sumiiffinnut siuariartorsinnaalluartunut aningaasaliinissaaq inassutigineqarpoq. Aamma aningaasaliissutit sumiiffinnut ikittuinnarnut ataatsimoortinneqarnatik siaruarneqassasut, inassutaavoq.
Aamma atuaruk Randi Vestergaard: Nassuiaat nunaqarfinnik inuerusaanissamik imaqanngilaq
Pilersaarutip aamma tikkuarpaa, najugaqarfiit ilaanni ullumikkut qimagarneqartuni pissutsit imaalerumaartut, matusinissaq oqaluuserisariaqalerluni. Taamaammat aqutamik taamaalillunilu aamma torersumik qanoq matuseratarsinaanermut maannakkut pilersaarusiortoqartariaqariaqarpoq.
Aamma atuaruk Naalakkersuisut pilersaarusiaq oqallisigerusunngilaat
Taama nalunaaruteqarneq politikerit nassuiaammik peersitsiinnarnerannik oqallisilinnginnerannillu kinguneqarpoq.
Kattuffiit paasisimasaat allaanerungaatsiarpoq.
- Pingaarnersiuineq pingaaruteqarpoq. KNAPK tusarniaassummut akissuteqarnermini taama aallaqqaasiivoq, erseqqissarlugu sanaartornissamut aningaasaliissutissat pineqartillugit pingaarnersiornissaq pingaarluinnartoq, taamaalilluni atorneqanngitsunik periarfissallit assersuutigalugu talittarfiliuunnissaannut pisariaqartumik aningaaasaliisoqarsinnaaniassammat.
Sullissisut politikerit isornartorsiutaata akerlerluinnaanik isornartorsiuipput. Nalunaarutip ajornartorsiuterpassuit paasissutissallu qaqippai, GE-lli aaqqiissutissatut siunnersuutit piviusut politikkikkullu inassuteqaatit amigaatigai.