Randi Vestergaard: Nassuiaat nunaqarfinnik inuerusaanissamik imaqanngilaq

Nuna tamakkerlugu pilersaarummut nassuiaat 2016-imoortoq nunaqarfinnik inuerusaanissamut innuttaasunillu pinngitsaaliilluni nuutsitsinissamut pilersaarutaanngilaq. Aningaasaqarnermut naalakkersuisoq Randi Vestergaard Evaldsen taama oqarpoq.

- Nunaqarfiit arlallit siunissami inuerukkiartornissaat siulittuutigineqarmat tamanna pilersaarusiorfigerusupparput, Randi Vestergaard Evaldsen oqarpoq.

Nuna tamakkerlugu pilersaarummut nassuiaat tusagassiortunik katersortitsinermi pingasunngormat tamanut saqqummiunneqartussaagaluarpoq, naalakkersuisulli siulittaasuata Kim Kielsenip Qanoruumi marlunngormat unnukkut pulaartorineqarnermini nuna tamakkerlugu pilersaarummut nassuiaat utertiinnarpaa. Nunatsinni inoqarfiit siunissaat pillugu immikkoortoq sakkortuallaarnerarpaa, naak nassuiaat Naalakkersuisut septembarip 19-iani ataatsimiinnerminni akuerereeraluaraat.

- Nunaqarfinni innuttaasut avaqqutiinnarlugit sulisoqarsinnaanngilaq. Taamaattoqarsinnaanngilaq. Taamaammat ullormut oqaluuserisassanit peerparput. Aappaagu nutaamik saqqummiussisoqarnissaa naatsorsuutigineqassaaq, Kim Kielsen Qanoruumi taama oqarpoq.

Nassuiaalli nunaqarfinnik matooraanissamut imaluunniit innuttaasunik pinngitsaaliilluni nuutsitsinissamut tunngassuteqanngilluinnarpoq, naak tamanna pillugu isornartorsiorneqaraluartoq, Randi Vestergaard Evaldsen KNR-imut taama nassuiaavoq.

- Nunaqarfinnik matusisoqarnianngilaq. Aamma pinngitsaaliilluni nuutsitsisoqarnianngilaq. Nassuiaammi oqaatigineqarpoq siunissami maannakkutut ingerlaannassagutta nunaqarfiit arlallit inuerukkiartussasut. Taamatullu pisoqassappat Naalakkersuisunut pingaartupilussuuvoq qanoq iliornissatsinnik inoqarfiillu qanoq pineqarnissaannik pilersaarusiornissarput. Inoqarfinnik matusinissaq Naalakkersuisut siunertarinngilluinnarpaat, naalakkersuisoq oqarpoq.

Aamma atuaruk Naalakkersuisut pilersaarusiaq oqallisigerusunngilaat

Randi Vestergaard Evaldsen naapertorlugu Nuna tamakkerlugu pilersaarusiamut nassuiaammi 2016-imoortumi naqiterneqareersumilu kukkunerit iluarsinissaannut piffissaqannginnera pissutigalugu nalunaarusiaq Inatsisartut ukiaanerani ataatsimiinnerannit peerneqarpoq.

- Inatsisartunut saqqummiunneqarsinnaanngilaq. Naqqissuinissamut, aammalu nassuiaateqarnissamut, piffissakippallaarpoq. Nuna tamakkerlugu pilersaarummut nassuiaammik nutaamik 2017-imi Inatsisartut ataatsimiilerpata saqqummiussisoqassaaq. Sorpassuit atorneqarsinnaapput, aamma nunaqarfiit siunissami qanoq pineqarnissaat oqaluuserissallugu pingaartuuvoq, naalakkersuisoq oqarpoq. 

Aamma atuaruk VIDEO Nuna tamakkerlugu pilersaarusiaq Kim Kielsenip atortussaajunnaarsippaa

Nassuiaatip Inatsisartut ataatsimiinnerannit peerneqarnissaanik aalajangerneq pissutigalugu nassuiaatip imarisaa tassanilu kaammattuutigineqartut Inatsisartuni politikerit oqaluuserisinnaajunnaarpaat, tamannalu ilaatigut Inuit Ataqatigiinnit sakkortuumik isornartorsiorneqarpoq. Isornartorsiuinerli taanna Randi Vestergaard Evaldsenip isumaqatiginngilaa.

- Oqallisissiat utertinneqartarnerat nalinginnaasuuvoq. Tamanna eqqumiitsortanngilaq, aningaasaqarnermut naalakkersuisoq KNR-imut taama oqarpoq.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat