Pingasunik ukiulik kalaallit qimmianit saassunneqarsimasoq

Niviarsiaraq pingasunik ukiulik Ilulissani qimmimit qimuttumit kimmarneqarluni saassunneqarsimasoq, politiit tusagassiuutinut allapput.
Niviarsiaraq pingasunik ukiulik kimmartinnermi kingorna ikilerneqarsimallunilu nakorsarneqartariaqarsimavoq. Qujanartumilli inuunerminik ulorianartorsiunngitsoq, Qaasuitsumi politiinit Preben Westh tusagassiutinut allappoq.
Niviarsiaqqap saassunneqarnera uani sapaatip akunnerani pisimavoq. Niaqqumigut ulussamigullu ikilersimasoq sakissamigullu tilluusaqartoq, politiit ilisimatitsipput.
Qimmeq saassussisoq pituutaqarsimavoq. Qimmip sassussinera qujanartumik arnamit naammattoorneqarsimallunilu unitsinneqarsimavoq.
Mianersoqqussut
Saassussisoqareersoq Qaasuitsumi politiit maanna mianersoqqusipput.
- Pisup alianartup qujanartumilli niviarsiaqqap ajunaarneranik kinguneqanngitsup malitsigisaanik eqqaasitsissutigerusupparput qimmit qimuttut ulorianartuummata.
- Piituutaqaraluaraangamilluunniit ulorianarsinnaapput. Ilulissani manna takornariaqaqaaq, qimmillu ulluni makkunani piaqqisarlutik. Meeqqat qanillivallaartoortarnerisa saniatigut inersimasut takornariaanerusut qanillivallaartartut maluginiarpagut, Preben Westh politiineersoq oqarpoq.
Mianersoqqussut Ilulissani kisimi atuutinngilaq, taamaakkaluartorli Westhip erseqqissaatigaa Ilulissani aqqusernit pisuinnaat aqqutaat qimmeqarfiusunut qanittuummata mianersornissaq pingaaruteqartoq.
Aammattaaq piaqqanik naammattuuinermi piaqqat arni qanittumiissinnaaneri ilisimasariaqartoq politiit erseqqissarpaat.