Pinerluttunik isumaginnittoqarfimmi siunnersortit isumaqatigiissuteqalerput

Pinerluttunik isumaginnittoqarfimmi sulisunut isumaqatigiissuteqartoqarneratigut sulisut nukittunerusumik inissisimalersut, Atorfillit Kattuffiat, AK, tusagassiutinut nalunaarummi taama ilaatigut oqarpoq.

Pinerluttunik Isumaginnittoqarfimmi sulisut isumaginninnermik ilaatigut suliallit sulisullu, 2019-ip naanissaata tungaanut inuttut ataasiakkaatut atorfimmut isumaqatigiissuteqarput.

Nutaamilli maanna isumaqatigiissusiortoqarpoq, Atorfillit Kattuffiata ukiualunni sulineratigut pinerluttunik Isumaginnittoqarfimmi isumaginninnermi suliallit sulisullu ataatsimut isumaqatigiissusiorfigineqarput, sulisullu pitsaanerusumik atugaqalerput:

- Ataatsimoorussamik isumaqatigiissuteqalernerat isumaqaqaaq, tassami maanna ataatsimoorlutik piumasaqaateqarsinnaanngorput. Piumasaqaateqarfigisinnaasaat tassaasinnaapput; aningaasarsianut tunngasut, atorfeqarnermut tunngasut allat kiisalu ulluinnarni sulinermi atugassarititaasut pillugit. Inuttut ataasiakkaatut isumaqatigiissuteqarnermiit nukittunerusumik inissisimalerput, AK-p siulittaasua Dina Olsen oqarpoq.

Atorfillit Kattuffiata Folketingimut ilaasortamut Aaja Chemnitz Larsenimut saaffiginninnerata kingorna Pinerluttunik Isumaginnittoqarfimmi sullissisut isumaqatigiissuteqalernissaat anguniarlugu sulineq ingerlalertortoq, AK-p pqaatigaa:

- AK-p Aaja Chemnitz Larsen qujaffigerusuppaa; isertitsivinni sullissisut Atorfillillu Kattuffiat sinnerlugit folketingimit suleqataasimammat, taamatullu suliap naammassilertornissaanut qulakkeerinnissimammat, Dina Olsen oqarpoq.

Isumaqatigiissut nutaaq, Isumaginninnermi siunnersortinut sullissisunullu naalagaaffimmi atorfeqartunut atuuttoq januaarip aallaqqaataa 2020 aallarnerfigalugu atuutilerpoq ukiullu sisamat atuutissalluni.