Pineqaatissinneqarsimasunut inissiisarfimmi nakkutilliisoq unnerluutigineqartup nappaataanik ilisimanninngitsoq

Tarnikkut napparsimasut Nuummi Pineqaatissinneqarsimasunut inissiisarfimmiittut qanoq sullinneqartarpat?

Illersuisup apeqqut taanna Narsami aallaasersortoqarneranut atatillugu eqqartuussinerup ulluisa pingajuanni unnerluutigineqartumut 21-nik ukiulimmut apeqqutiginiarsaraa.

21-nik ukiulik nunatta kujataani illoqarfimmi inunnik 14-inik toqutseriarsimasutut unnerluutigineqarpoq – taassumalu tamanna nassuerutigaa.

Unnerluutigineqartoq Aarhus Universitetshospitalip tarnikkut napparsimasunut immikkoortortaqarfiani paarineqarluni ullumikkut tigummigallarneqarnera pissutigalugu eqqartuussineq Aarhusip eqqartuussiviani ingerlanneqarpoq.

Taannali Narsami siorna marsip 22-ani aallaasersornermini tigusarineqarnermi kingorna minnerpaamik ukiup affaa Nuummi Pineqaatissinneqarsimasunut inissiisarfimmiippoq. Tassanilu nakuusernernut arlalinnut ilaasutut aamma unnerluutigineqarpoq.

Majuartarfiit amitsunik tummerallit sulisut tungaannut milorujukkai

Unnerluussisussaatitaasup Nuummi pineqaatissinneqarsimasunut inissiisarfimmi nakkutilliisoq siorna oktobarip arfineq-pingajuanni unnukkut pisimasumut atatillugu ilisimannittutut ullumikkut aggersarpaa.

Pineqaatissinneqarsimasunut inissiisarfimmi immikkoortortaq unnerluutigineqartup piffissami tassani inissinneqarsimaffigisaa inissiisarfimmiittut akornanni eqqissiviilliortoqarnera pissutigalugu marlunnut avinneqarsimavoq. Taamaammat inissiisarfimmiittut akunnerit arlalikkaarlutik tulleriiaallutik taamaallaat ataatsimoorfiusunukarsinnaatitaasimasut, ilisimannittoq nassuiaavoq.

Ilisimannittup oqarnera naapertorlugu unnerluutigineqartoq alla peqatigalugu inigisaminukariartornermini nilliallunilu matu isimmippaa. Aninissani kissaatigalugu.

Nakkutilliisut ineqatigisaa eqqissisimammat anillatsippaat. Sulisullu unnerluutigineqartoq puffassimaarluni ataatsimoorfiusunukassanngitsoq nalilerpaat. Unnerluutigineqartulli tamanna kamannerussutigiliinnarpaa.

- Iniminit aninngikkuni inini sequtsissallugu oqarpoq, ilisimannittutut nassuiaateqartoq oqarpoq.

Unnerluutigineqartullu sioorasaarutini eqquutsippaa. Inimini sikaaviit ilaatigut uppitippai igalaarlu majuartarfiit amitsunik tummerartalik saviminiusut siniffimmut qaleriissitamut atorneqartartut atorlugit aserorlugu.

Sulisut sulisoqatigiinnut allanut tamatuma kingorna sianerput, taakkulu unnerluutigineqartoq inimut nakkutilliivimmukaanneqassasoq nalilerpaat. Sulisulli aallerneranni unnerluutigineqartup majuartarfiit matumik ammaasut tungaannut milorujuppai.

Ilisimannittutulli nassuiaateqartup majuartarfinnik suleqatinilu eqqorneqannginnerminni matu matuaa.

- Unissasoq uninngikkunilu qasilitsortalimmik serparneqassasoq oqarfigaara. Uninngimmalli seqqarneqarpoq. Taava unippoq, pineqaatissinneqarsimasunut inissiisarfimmi nakkutilliisoq ilisimannittutut nassuiaateqartoq oqarpoq.

Unnerluutigineqartoq tamatuma kingorna pinerluttunut paffequtsiunneqartartulerneqarpoq inimullu nakkutilliivimmukaanneqarluni.

Unnerluussisoq: Tarnikkut napparsimasunut atatillugu qanoq ilinniagaqarpit?

Eqqartuussinerup ingerlanerani ilisimannittut katillugit qulit apersorneqarnerani illersuisoq Christina Johnsen apeqquteqarnissaminik kissaateqarsimanngilaq. Taannali pineqaatissinneqarsimasunut inissiisarfimmi nakkutilliisumut apeqquteqarusuppoq.

Taassuma immikkoortortaq inissinneqarsimasut ataatsimoortarfinnukarniaraangamik tulleriiaaffigisartagaat sooq marlunnut avinneqarsimanersoq apeqqutigaa.

Piffissami tassani inissinneqarsimasut amerlavallaarnerat pissutaava?

- Naamik, immikkoortortami pissusilersuutit naleqqutinngiinnarput amerlavallaartunik inissinneqarsimasoqanngilaq, pineqaatissinneqarsimasunut inissiisarfimmi nakkutilliisoq oqarpoq.

Tarnikkut napparsimasunut atatillugu qanoq ilinniagaqarpit?

- Maanna ukiut 20-t sinnerlugit misilittagaqarpunga, taamaammat assigiinngitsunik naapitaqarnikuuvunga. Kisianni tarnikkut napparsimasunut tunngatillugu ilinniagaqanngilanga. Naamik ilinniagaqanngilanga, pineqaatissinneqarsimasunut inissiisarfimmi nakkutilliisoq oqarpoq.

Taama nappaateqarluni allami inissinneqarsimassasoq nalilerpiuk?

- Nappaataata suussulerneqarnera ilisimanngilara. Unnerluutigineqartoq qanoq nappaateqarnersoq naluara, nakkutilliisoq oqarpoq.

Unnerluutigineqartup qanoq nappaateqarnera Christina Johnsenip paasissutissiissutiginngilaa.

21-nik ukiullip unnerluutigineqartup inuttut atassuteqaatai illersuisup aqagu saqqummiutissavai, tassanilu tarnikkut qanoq inneranik misissuineq aamma nalunaajassallugu.

Eqqartuussivimmi suliami tallimanngormat eqqartuussuteqartoqassaaq.