Narsami aallaasersungaatsiarnermi unnerluutigineqartoq: - Kamassaqangaatsiarnikuugama
![](/sites/default/files/styles/image_934x467/public/2024-03/retten%20i%20aarhus3.jpeg?itok=kjudHhOz)
Angut inuusuttoq siorna marsip 22-ani Narsami aqqusinermi heliportillu eqqaani seqqortaarami kamassaqangaatsiarsimasutut imminut nassuiaatigivoq.
Aallaasersortoqarnerani toqusoqanngilaq, qulimiguulimmillu aquttoq ataaseq aallaammik eqqorneqarpoq allallu seqqornermit igalaamerngit aseqqukuanik ikilerneqarput.
Angut 21-nik ukiulik Eqqartuussisoqarfik Kujallermi ullumi unnerluutigineqarpoq, eqqartuussinerli Aarhusip eqqartuussiviani suliarineqarpoq. Angut pissutsit katillugit 28-t pillugit unnerluutigineqarpoq, taakku nunatta kujataani qoorortuuaqqamik tillinnermit, nakuusernissamik siorasaarinermut inunnillu katillugit 14-inik toqutseriarnermik ilagaqarput. Angutip pissutsit tamarmik nassuerutigai.
Unnerluutigineqartoq eqqartuussivimmi eqqissisimallunilu annilaanganngilaq. Angut nujaqannginngajappoq kakkivissamigullu umeqalaarluni, angutip ilulleq, qarliit ateraasallu atorpai, taanna pinerluttunut paffequsiunneqartartut ungersarlu elektroniskiusut atorlugit politiinit tallimanit eqqunneqarpoq. Taakku eqqartuussisoqarnerata nalaani aamma najuupput.
Angulli Narsami siorna marsip 22-ani aallaasersornermini allaanerulluni eqqissiveqarnanilu kamassimasimavoq. Unnerluutigineqartoq eqqartuussinermi killisiorneqarnermini nassuiaavoq:
- Seqqoqattaalinnginninni (illup eqqaani aaqq.) eqqarsarpunga kamassara Narsami innuttaasunut tamanut tutsinniarlugu.
Angut kamassimalluni misigigajussimallugu nassuiaatigaa, suminngaanniillu kamassaqarnerluni nassuiarsinnaanngilaa.
- Aallaammik aallilaariarl takuss
Pisoq tamanna angutip Narsami umiarsualivimmi ilisarisimasaminut marlunnut 2023-mi marsip 20-ani ualikkut kamalernerani aallartippoq.
Unnerluutigineqartup oqarnera naapertorlugu angutit taakku qinngasaarerpasissumik pissusilersorsimapput. Taamaammat unnerluutigineqartup angutip aappaa niaquatigut tilluppaa toqqusassillugulu. Tamatuma kingorna inuit marluk taakku ima oqaaseqarluni siorasaarpai:
- Aallaammik aallilaariarl takuss.
Unnerluutigineqartup qoorortuuaraq aallartittariaannaq qinngutertalik umiarsualimmi aalisariummiittutut ilisimasani unnuk taanna tillippaa. Aqaguanilu qoorortuuaqqap imassai – amerlassusai ilisimaneqanngitsut unnerluutigineqartulli ”amerlasuutut” eqqaamasani pisiarai.
Toqutsiniarluni seqqortoq
Umiarsualivimmi pagginnermit ullut marluk qaangiuttut aatsaat aallaasersortoqarpoq.
Seqqorneq siulleq unnerluutigineqartup umiarsualivimmi pallungalluni angutinut marlunnut illup qaani suliaqartunut umerneranik aallartippoq – unnerluutigineqartup oqarnera naapertorlu taakku kilometerimik ataatsimit marlunnut ungasitsigisumiipput.
Teknikkikkut misissuinermit uppernarsaatit illumut aqqaneq-marloriarluni seqqorsimasoq takutippaat. Unnerluutigineqartulli oqarnera naapertorlugu inuit marluk illup qaavaniittut kisimik tungaannut aallaasimavoq. Killisiorneqarnermi toqutsiniarluni seqqorsimanersoq toqqaannartumik aperineqarami akivoq:
- Aap.
Inuit pingasut illumiittut, tamarmillu illuminngaanniit qimaasut politiinut sianerput.
Illup tungaanut aallaasersortoqarnerata nalaani qulimiguulik heliportimut tikippoq. Unnerluutigineqartoq heliportip tungaanut ingerlaalerpoq, taassumallu – nammineq oqarnera naapertorlugu – 30-mit 40 meterimit ungasitsigaluni qulimiguulimmut seqqortaarpoq.
Qulimiguulimmi aquttut marluk ilaasullu qulingiluat qulimiguulimmiipput, angut taakkuninnga tamanik qoorortuuaqqamik toqutseriarsimasutut unnerluutigineqarpoq. Qulimiguulimmik aquttup aappaa qulimiguulimmit qimaalluni isumannaatsumukarniarnermini nissumigut aallaaneqarpoq. Qulimiguulimmi aquttut tamarmik qulimiguullip igalaavata seqqornermit eqqorneqarluni aserorneranit niaqqumigut igalaaminernit aamma eqqorneqarput.
![](/sites/default/files/styles/image_934x467/public/2023-03/Helikopter%20Hans-Peter%20N.%20Bay.jpeg?itok=v9Bz_9KY)
Angut 21-nik ukiulik angutip gummigedimiittup tungaanut seqqorsimasutut aamma unnerluutigineqarpoq.
21-nik ukiullip seqqortaarfigisami tungaaniittut inuit ilisarisimalluarnagit imaluunniit inuttut atassuseqarfiginagit eqqartuussivimmi paasissutissiissutigaa.
Kamassaqarnini pissutigalugu qanigisaminut sianertarnikuusimasoq
21-nik ukiulik unnerluutigineqartoq aallaasersornerup nalaani immikkuualuttunut tunngatillugu aperineqaraangami 'naluara'-mik, aamma 'eqqaamanngilara'-mik akissuteqartarpoq.
Taassumali tigusarineqanngitsiarnermini politiit aarlerisaarummik seqqoqqammitsiarneranni qoorortooq aqqusinermut ilisimallugu eqqaamavaa.
- Ajornerusumik pisoqassanngimmat tunniutiinnarpunga, angut eqqartuussivimmi nassuiaavoq.
Angut nunamut nallarluni tunniutiinnarpoq. Angullu tassani angajussarisimasaminit sianerfigitippoq. 21-nik ukiullip angajussarisimasaata aallaasersorneq pissutigalugu maanna tigusarineqalersoq oqarfigaa.
Illersuisullu Christina Johnsenip qatanngutiminut atassuteqarnera killisiuinermi qaqippaa. Unnerluutigineqartup kamassimagaangami qatanngutini sianerfigisarnikuusimallugit oqaluttuaraa. Aallaasernissanili sioqqullugu taamaaliorsimanani paasissutissiissutigaa.
Unnerluutigineqartup oqarasuaataanik misissuinerup angut aallaasersornerup aallartinnginnerani angerlarsimaffimmini qoorortuuaqqamik tigummiarluni assinga imassallu assingi takutippai.
Oqarasuaammillu misissuinerup 21-nik ukiullip oqaaseq ”Tusaannga” kinaassutsimik isertuussilluni oqarasuaatikkut siunnersuisarfik internettikkut ujartornikuusimagaa aamma takutippaa. Taannali kamassimasarnermini pisortanit siunnersorneqarnissamik siunertaqartumik sianernikuusimannginnerarpoq.
Unnerluutigineqartoq aallaasersortoqarnerani inunnut eqqugaasunut utoqqatsissuteqarusunnersoq illersuisup aamma aperaa. Taamaaliornianngilarli, angutilli taakku tupaqqasimassappata paasisinnaanerarpaa.
Angutip 21-nik ukiullip ullumikkut ajorani kamasserpallaartarunnaarsimallunilu ilanngullugu oqaatigaa. Tamanna ullumikkut ikiorneqarneranik pissuteqarpoq.
Unnerluutigineqartoq Nuummi Pinerluuteqarsimasunut inissiisarfimmi inigisaminik ikuallatsitseriarnini kiisalu pinerluuteqarsimasunut inissiisarfimmi nakkutilliisumut saassussisimanini pissutigalugit Aarhus Universitetshospitalip tarnikkut napparsimasunut immikkoortortaqarfiani ullumikkut tigummigallarneqarpoq. Pisimasut taakku Aarhusimi eqqartuussisoqarnerani 21-nik ukiulimmut aamma unnerluutigineqarput.