21-nik ukiullip Narsami inunnik 14-nik aallaammik toqutseriarsimanini nassuerutigaa
![](/sites/default/files/styles/image_934x467/public/2024-03/20231220-092009-1-1920x1280we.jpg?itok=Ui6tbPQr)
Angutip 21-nik ukiullip siorna marsip 22-ani qulimiguulimmut milersumut seqqortaarsimanini nassuerutigaa.
Qulimiguulimmi aquttut marluk aallaasersortoqarnerani ikilerneqarput. Angut inuit allat arlallit tungaannut aamma seqqorpoq – angut katillugit 14-inut toqutseriarsimasutut unnerluutigineqarpoq.
Angutip iliuuserineqarsimanerarneqartut Aarhusip eqqartuussiviani suliap suliarineqarnerani ullaaq manna nassuerutigai.
Angut Danmarkimi tarnikkut nappaatilinnut napparsimmavimmi Skejbymiinnera pissutigalugu suliaq Aarhusip eqqartuussiviani suliarineqarpoq.
Kalaallit Nunaanni Politiit qoorortuuaraq aallartiinnariaq Narsap umiarsualiaviani aalisariummiittoq pisumut ullut marluk sioqqullugit tillinneqarsimasoq atorlugu angut seqqortaarsimasoraat.
21-nik ukiullip tamanna ilaatigut nassuerutigaa.
Aallaasersortoqarnera minutsinik 45-nik sivisussuseqartoq
Seqqortaarnerpassuit nalunaaquttap 16.30-p 17.15-illu akornanni pisimasut, KNR-ip allagaatinik takunnissinnaatitaaffigisaani unnerluussissummi allassimavoq.
Unnerluutigineqartup inunnut marlunnut Narsami illup qalianiittunut arlaleriarluni seqqornerani aallaasersorneq aallartippoq. Angutip qoorortuuaraq aallartiinnariaq kaliber 17 atorsimavaa.
Angut illup pingasunik isersimasoqartup tungaanut seqqortaarsimasut aamma unnerluutigineqarpoq.
Qulimiguulimmut aallaasersortoq
Unnerluussissut naapertorlugu angut heliportip tungaanut ingerlaarsimavoq. Tassanilu qulimiguulik GL 3333 milersoq aallaammik eqqorpaa. Qulimiguulimmi aquttut marluk ilaasullu suli issiavimminniipput.
Unnerluutigineqartoq qoorortuuaraq aallartittariaannaq atorlugu arlaleriarluni seqqorpoq. Qulimiguulimmilu aquttut marluk ikilerneqarlutik – angut inuusuttoq qulimiguulimmut seqqortaarnerminut atatillugu inunnik aqqanilinnik toqutseriarsimasutut unnerluutigineqarpoq.
Angutip inuusuttup unnerluutigineqarnerani qulimiguulimmut seqqortaarnermi aqqanilinnut toqutseriarnerit illullu qalianiittunut marlunnut toqutseriariarnerit katillugit 13-iupput. Toqutseriartutut unnerluutiginninneq kingulleq gummigedimik ingerlatsisumut toqutseriarneruvoq.
Angut aallaasersornermi kingunitsianngua tigummigallagassanngortinneqarpoq, taannalu maannamut tigummigallarneqarsimalluni. Taanna Nuummi pinerluuteqarsimasunut inissiisarfimmi tigummineqarpoq, tassanilu inatsimmik aamma unioqqutitsisimavoq. Angut taamaammat Aarhusip avannaani tarnikkut napparsimasunut napparsimmavimmut nuutsinneqarpoq.
Nutarterneqarpoq....