Pilersuisumi pisiassat nutaat 700-it nioqqutaalissasut

Pilersuisup pisiniarfiini nioqqutissat meqqii nalunnginneqarluartut marluk, Gestus aamma First Price ukiumi nutaamiit Rema 1000-imik taarserneqartussanngorput.

KNI-mmi ukiuni tallimani atuuttussamik pisiortortarfini Dagrofa Reitangruppemik Norgemeersumik taarsilerpaa. Taamaalilluni nioqqutissat nerisassallu piareeriikkat Rema 1000-meersut 700-it missaaniittut Pilersuisumi pisiassaalissapput.

Meqqilli akisunerusut pitsaanerusullu maanna pisiassaareersut Gestusimik First Pricemillu meqqeqanngitsut suli nioqqutaassasut KNI-p pisortaanera Brian Weuge Chemnitz oqarpoq.

KNI-p Reitangruppemik isumaqatigiissutaa ukiunut tallimanoortoq 500 millionit koruunit missaannik akeqartoq, Brian Weuge Chemnitz oqarpoq.

Akikinnerulissasut

Isumaqatigiissullu nioqqutissat akikillinerannik kinguneqassaaq.

- Aap tamanna soorunami naatsorsuutigaara. Nioqqutissat akikinnerusut pisiaringutsigit, pisisartut aamma akikinnerusumik pisiarissavaat, KNI-p pisortaa Brian Weuge Chemnitz KNR-imut oqarpoq.

Nioqqutissat piareeriikkat soorlu qallersukkat patitsitat sandwichit paninillu illoqarfinni nunaqarfinnilu nioqqutaalissasut pisortaq oqarpoq.

- Soorlu paninit sandwichillu fransk hotdogiinnarniit illinnarnerusut, Brian Weuge Chemnitz oqarpoq.

Aggustip qaammataa

Taamaalilluni nerisassat piareeriikkat nalunnginneqarluartut Danamrkimi, Sverigemi Norgemilu 7-Elevenimi pisiarineqartartut Pilersuisup pisiniarfiini pisiarineqarsinnaalissapput.

Nioqqutissat ullormiit ullormut Rema 1000-meersunik taarserneqarsinnaangillat.

Taarsersuinerlu umiarsuarmik pajuttumik tikittoqaraangat pisassaaq.

Aappaagulu aggutsip qaammataani Rema 1000-meersut tamanit pisiarineqartalersinnaanissaat pisortap naatsorsuutigaa.