Piggappaat Danmarkimi piggatsitsilersoq

Kalaallit qallunaat nunaanni najugallik qilanaarutissaqalerput. Tassami Hans Jukku Noahsen, alikkusersuisartoq tamatigoortoq, inuttaralugu Piggappaat Danmarkimut immiussiartulerpoq.

- Kalaallit tusaamasat danmarkimi najugallik pulaartorissamaarpagut, Hans Jukku Noahsen, angalanissaminut qilanaartoq, KNR-imut oqarpoq. Taassuma kikkut pulaartoriniarnerlugit ilisimatitsissutiginngilaa.

Illoqarfiit pingasut, immiussat sisamat

Aarhusimi Kalaallit Illuutaanni marsip 25-ani 26-anilu isiginnaariarneqarsinnaavoq. Aarhusimi Kalaallit Illuutaanni isissutissaq 50 koruuneqassaaq, ilinniartunut 25 koruuneqassalluni.

Marsillu 27-ani Aalborgimi, kalaaleqarfimmi, Piggappaat immiunneqassalluni.

Odense minitaassanngilaq, tassami sapaammi marsip 29-ani aamma isiginnariarneqarsinnaassaaq. Isissutissaq 25 koruuneqassaaq, matullu nal. 19.30 ammarneqassallutik. Isissutissat Café Allumi aamma Nordatlantisk Husip pisiniarfiani pisarineqarsinnaaapput.

Kalaallit Illuutaasa maluginiaqquaat 15-leereersimasut taamaallaat isersinnaammata aammalu immiussinerit kalaallisuinnaq ingerlanneqassammata.

Hans Jukku aamma immikkut aliikkusersuissaaq

Aliikkusersuisartoq tallimanngorpat marsip 20-ani Københavnimi Nordatlantens Bryggemi quijasaarissaaq.

Hans Jukku Noahsenip kalaallit qallunaat nunaanni najugallik naapinnissai pissangagalugu oqaluttuarpoq.

- Pissanganarpoq kalaaleqatigut danmarkimiittut qanoq innersut. Imaassinnaasoq qallunaanit sunnertissimallutik illanngitsoortut, Hans Jukku Noahsen illalaajutigaluni oqarpoq.

Taasuma quijasaarinissani pilersaarusioqqissaarneq ajorpai.

- Inuit takkussimasut qanoq inneri takulaariarlugit, taakku aallaavigalugit torrutiinnarlugu illarsaarissaanga, Hans Jukku Noahsen naggasiivoq.