Piffissaq nutaaq - nipit nutaat

Kalaallit perngaammik atuakkiortut pingasut piffissami kingullermi saqqummerput.

Minerunngitsumik oqaluttualiaaqqanik allannermik unammisitsineq Allatta taamaattoqarneranut aallartisaataavoq, inuusuttulli atuakkiortut atuakkanik nutaanik amigaateqarneq matussuserniarpaat, oqaluttualiaaqqanik katersukkanik "Zombiet Nunnaannik"  atuakkiortoq isumaqarpoq.

Aamma atuaruk Kalaallit inuusuttut atuakkiaat juullimi tunissutigineqarluassasut

- Isumaqarpunga kinguaariit kingulliit allataannik massakkut amigaateqartugut. Atuakkialerineq 90-ikkunni 2000-ikkullu aallartineranni unikannersimasutut ippoq. Tassanilu inuusuttut massakkut amigaateqarput, tassani pereernikunik tassani inuunikunik atuagassaminnik, Sørine Steenholdt KNR-imut oqarpoq.

- Ilissi atukkiasi sutigut allaaneruppat?

- Atuakkalerinerup siulitsinnut sanillillugu allaanerussutigivaa, piffissap ingerlaarnerani inuiaqatigiit ineriartornitsinni atuakkialerineq tarrarsortarami aamma, soorlu sumut killinnitsinnik qanoq inuunitsinnik. Taakkua amigaatigigatsigit. Taanna allaanerussutigivaa, taakkua siulivut nunaminnut asanninneq - inoqatiminnut asanninneq sammisorujussuunikuuaat.

Kinguaariit nutaat isumat nutaat

Sooq inuusuttunit aammalumi utoqqaanerusunit inuusuttut atuakkiaat atuarneqarusunnersut, Sørine Steenholdtip nalunngilluinnarpaa.

- Uanga misigisimavunga, aatsaat aallartilersugut. Atuakkiortorpassuaqarnikuuvoq, kisianni massakkut aamma utoqqaliartorlutillu, taavalu aamma pissutsinut malinnaanerat allamiikkami. 

Aamma atuaruk Nunatsinni atuakkiortut nutaat

- Kinguaariit kingulliit oqaluttassaat aamma allaavoq, oqaluttuasaat aamma allaapput. Massakkut allanik oqaluttuassanik ulikkaarpugut, taakkualu pissanganartorujussuarmi inissisimapput, Sørine Steenholdt KNR-imut oqarpoq.